Oralda qańǵybas ıtter birneshe qoıdy tamaqtap ketken

ORAL. KAZINFORM – Oral qalasynda qańǵybas ıtter aýlada turǵan birneshe qoıdy tamaqtap, óltirip ketken. 

Qalaǵa qarasty Serebrıakov kentiniń turǵyny Marat Óteshevtiń aıtýynsha, oqıǵa 20 aqpan kúni bolǵan. 

«Saǵat 16.00-17.00-der shamasynda qańǵybas ıtter osy aýylda turatyn aǵam Amangeldi Óteshevtiń aýlasyna kirip, eki qoı, bir qozyny jaryp ketti. Budan eki-úsh kún buryn taǵy bir qoıdy óltirip ketken edi. Qazirgi kezde ýchaskelik polıtsııa ınspektorlary kelip, oqıǵany tekserip jatyr. Aýylda qańǵybas ıtter kóbeıip, kúsh bermeı tur», - dedi M.Óteshev Kazinform tilshisine bergen suhbatynda.

Oral qalalyq veterınarııalyq stantsııasynyń dırektory Erlan Işanov Serebrıakov aýylynan da aryz-shaǵym túskenin, sol boıynsha tıisti sharalar qolǵa  alynatynyn jetkizdi.

«Qalada buralqy ıtterdiń kóbeıip ketkeni ras. Biz aryz-shaǵym boıynsha barǵan kezde keı turǵyndar kedergi keltiredi. Iesi joq ıtter top-tobymen júredi. Olar sterılızatsııadan ótpegen, chıptelmegen. Mine, sol qańǵybas ıtterdi aýlaýǵa barǵan kezde eki-úsh kún buryn er adam bizdiń qyzmetkerlerdi balaǵattaǵanymen qoımaı, artynan kelip, bótelkemen soǵyp, bireýiniń basyn jarǵan. Osyndaı shetin oqıǵalardyń aldyn alý baǵytynda qala ákimdigine bizben polıtsııa qyzmetkerleriniń birge shyǵýy kerektigi jóninde usynys aıtyp kelemin», - dedi E.Işanov.

BQO polıtsııa departamentiniń baspasóz qyzmeti Serebrıakov aýylyndaǵy oqıǵa boıynsha aqparattyń keıin beriletinin aıtty.

Itterdiń adamdarǵa zaqym keltirýi de tyıylmaı tur. BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń aıtýynsha, bıylǵy qańtar aıynda ıt tistegen adamnyń sany 176-ǵa jetken. Sonyń ishinde 142-sin ıt qaýyp alǵan, 33-in mysyq tistegen. 

«142 adamdy qapqan 45 ıttiń ıesi bar, al 97-si – qańǵybas ıtter. Tistelgenderdiń 34-i – 14 jasqa deıingi balalar. Oblysta qutyrma oshaǵy tirkelgen joq», - dedi N.Mustaev.

Eske sala keteıik, budan buryn vetstantsııa dırektorynyń buralqy ıt jáne adam qaýipsizdigi týraly aıtqan suhbatyn jarııalaǵan bolatynbyz.