Oralda kanadalyq «Twin Otter Series 400» ushaǵy tanystyryldy (FOTO)
ORAL. QazAqparat - Kanadalyq «Viking Air» kompanııasynyń «Twin Otter Series 400» ushaǵy alys aýdandarmen qarym-qatynasqa qolaıly. Bul týraly atalǵan shaǵyn ushaqtyń Oral halyqaralyq áýejaıynda ótkizilgen tanystyrylymynda aıtyldy.
Kompanııa ókilderi Devıd Hıt pen Ýeın Hendrıdiń sózderine qaraǵanda, 19 orynǵa eseptelgen, qyzmet kórsetý túri qarapaıym ushaq osyǵan deıin elimizdiń Astana, Qaraǵandy, Shymkent, Aqtaý, Atyraý qalalarynda tanystyrylǵan. Ushaqtyń ereksheligi sol, ol topyraq, sý, qarǵa qona alady. Qazaqstannyń klımattyq jaǵdaıyna qolaıly ushaqty bir pılot ta júrgize alady. Jańartylǵan Series 400 túri 2010 jyldan beri shyǵarylyp keledi, osyǵan deıin 100 shamasynda ushaq daıyndalǵan. Ushaqtyń jańa úlgisi AQSh, Latyn Amerıkasy, Eýropa, Ortalyq Azııa elderinde satylýda. Qytaı 50 ushaqqa tapsyrys berse, Reseıde 12 laıner ushyp kórgen, taǵy 10-yna usynym bar. «Bul ushaqtar tek jolaýshy tasymaldaý ǵana emes, sonymen qatar munaıgaz, medıtsına salasynda, adamdardy kóshirý, desant túsirý, shekara men munaı qubyrlaryn baqylaý, júk jetkizý maqsatynda qoldanylady. Asa qıyn jerlerge de ushyp bara alady. Ushaqtyń ishinde naýqastardy jetkizý úshin barlyq jaǵdaı jasalǵan. Medıtsınalyq maqsatta birden 8 adamdy kóshire alady. Ushaqty sondaı-aq kúzet, seısmıkalyq maqsatta da paıdalanýǵa bolady», dedi kompanııa marketıng bóliminiń dırektory Devıd Hıt.
Tanystyrylymǵa qatysyp, ushaqpen kóterilip kórgen oblys ákimi Altaı Kólginov aýdandary shalǵaı ornalasqan óńirler úshin mundaı ushaqtyń tıimdi ekendigin atap ótti. Mysaly, Bókeı ordasy, Jánibek syndy oblys ortalyǵynan 500-600 shaqyrym qashyqtyqtaǵy aýdandarmen áýe baılanysyn ornatýǵa bolady. Bul ushaq jer talǵamaıtyn bolǵandyqtan, arnaıy ushyp-qoný jolaqtaryn salýdyń da qajeti joq. Sondyqtan jan-jaqty ekonomıkalyq taldaý jasalyp, ınvestıtsııa tartylatyn bolsa, bul óńir úshin yńǵaıly joba bolmaq.
Aıta keteıik, atalmysh ushaqtyń quny - 7 mln dollar.
