Oralda «Qamqorlyq» ońaltý ortalyǵy jumysyn bastady
ORAL. QazAqparat – Oralda oblystyq kópbeıindi balalar aýrýhanasynda «Qamqorlyq» ońaltý ortalyǵy óz jumysyn bastady, dep habarlaıdy QazAqparat tilshisi.
QR tuńǵysh Prezıdenti, Elbasy N.Nazarbaevtyń qory men «Samuryq-Qazyna» AQ-nyń demeýshiligimen ashylǵan ortalyqtyń tynys-tirshiligimen tanysqan oblys ákiminiń birinshi orynbasary Muhtar Mankeevtiń aıtýynsha, bul – múmkindigi shekteýli, erekshe balalar men olardyń ata-analary úshin jasalyp otyrǵan úlken qamqorlyq.
Munda jańa týǵan sábıden bastap 18 jasqa deıingi balalardy emdeýge múmkindik bar. «Qamqorlyq» ortalyǵynda otyzǵa jýyq maman jumys isteıdi, olardyń bári de Nur-Sultan qalasyndaǵy ortalyq klınıkalarda biliktilikterin kóterip keldi. Bolashaqta tájirıbe jınaqtaı otyryp, osyndaı ortalyqtardy aýdandarda ashý kózdelýde.
«Qamqorlyq» ońaltý ortalyǵynyń meńgerýshisi Jadyra Sársenǵazıevanyń sózine qaraǵanda, emdelýshilerge qolaıly bolýy úshin ortalyq birinshi qabatta oryn tepken. Jalpy aýdany – 590 sharshy metr.
Ortalyqta múgedek, tirek-qımyl qozǵalysynda, týabitti júrek aqaýy bar, júıke júıesi syrqatyna shaldyqqan balalar emdeledi. «Qamqorlyq» ortalyǵy «Samuryq-Qazyna» qorynyń qarjylaı qoldaýymen Kanada, AQSh, Germanııa jáne Reseıde shyǵarylǵan zamanaýı qural-jabdyqtarmen jasaqtalǵan. Onyń jalpy quny – 175 mln teńge.
«Ortalyqta aıyna 50, jylyna 600 bala ońaltýdan óte alady. Emdeý kýrsy – 21 kún. Olar úshin trenajerler ǵana emes, sondaı-aq tuz shahtasy, shýngıt bólmesi, oıyn zaly ázirlengen. Al aýdandardan kelgen balalarǵa statsıonar táýlik boıy qyzmet etedi. Tilek bildirýshiler jatqyzý portaly arqyly ótinim beredi. Oblysta ońaltýdy qajet etetin 2700-den astam bala bar. Olar osyǵan deıin jeke klınıkalarda emdelip kelse, endi mindetti medıtsınalyq saqtandyrý júıesi aıasynda tegin kómek ala alady», dedi J.Sársenǵazıeva.
