Oralda «KamAZ» ben jeńil kólik soqtyǵysyp, bir adam qaza tapty
ORAL. QazAqparat – Oralda «KamAZ» ben jeńil kólik soqtyǵysyp, bir adam qaza tapty, dep habarlaıdy QazAqparat tilshisi.
Oblystyq densaýlyq saqtaý basqarmasynyń naqtylaýynsha, 72 jastaǵy áıel jedel járdem kelgenge deıin mert boldy. Jabyq bas-mı jaraqatyn alǵan 78 jastaǵy er adamnyń mıy shaıqalǵan, oń jaǵyndaǵy 6-7 qabyrǵasy synǵan. Ol oblystyq kópbeıindi aýrýhananyń hırýrgııalyq bólimshesine jatqyzyldy.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa búgin saǵat 10.40-ta Oral-Saratov kúre joly men Pıatımar kóshesiniń qıylysynda boldy.
«KamAZ» ben «VAZ-2108» avtokóligi túıisti. Sonyń saldarynan jeńil kóliktiń júrgizýshisi túrli jaraqattarmen aýrýhanaǵa jetkizildi. Sol kólikte otyrǵan jolaýshy áıel oqıǵa ornynda kóz jumdy.
Qazirgi kezde QR 345-baby 3-bóligine sáıkes sotqa deıingi tergeý amaldary júrgizilýde.
Bıylǵy toǵyz aıda óńirde 213 jol-kólik oqıǵasy (2019 jyly osy merzimde – 226, 5,8 paıyzǵa kem) bolyp, sonyń saldarynan 50 adam (78, 35,9 paıyzǵa az) qaza taýyp, 251-i (294, 14,6 paıyzǵa kem) túrli jaraqat aldy.
Eske sala keteıik, budan buryn BQO-da jol apatynan eki adam qaza tapqanyn jazǵan bolatynbyz.
