Oralda qalalyq sottyń sýdıasy jumys ornynda kóz jumdy

ORAL. QazAqparat – Oralda qalalyq sottyń sýdıasy jumys ornynda kóz jumdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmetinen málim etkenindeı, oqıǵa 10 naýryz kúni tańmen boldy.

«Jedel járdem saǵat 09.48-de shaqyryldy. Qalalyq sotta jumys ornynda 1968 jylǵy er adam aıaq astynan jaısyz sezingen. Jedel járdemdi shaqyrǵan adamnyń sózine qaraǵanda, sýdıa qoryldap, es-tússiz qulaǵan. Marqumnyń júregi toqtap qalǵan, jedel járdem kelgenge deıin qaıtys bolyp ketken», dep habarlady vedomstvodan.

BQO polıtsııa bolǵan oqıǵany rastap, er adamnyń kenetten dúnıeden ozǵanyn jetkizdi.

Aıta keteıik, keshe Túrkistan oblysynyń prokýrory Marat Álıhanov jumys ornynda qaıtys bolǵanyn jazǵan edik.