Oralda qalaǵa kirip ketken elik beınejazbaǵa túsip qaldy

ORAL. KAZINFORM – Oral qalasynda eliktiń jol boıymen shaýyp kele jatqany jóninde áleýmettik jelide beınejazba jarııalandy.

BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń aıtýynsha, oqıǵa 5 aqpan kúni bolǵan.

Oral orman jáne janýarlar dúnıesin qorǵaý jónindegi kommýnaldyq memlekettik mekemesine Jelaev trassasy boıyndaǵy «Búrkit» janar-jaǵar maı stantsııasy mańyndaǵy qorshaý toryna eliktiń qystyrylyp qalǵany jóninde habar túsken. 

– Ormanshylar kelgenge deıin janar-jaǵar maı stantsııasy qyzmetkerleri elikti bosatqan. Sodan keıin orman sharýashylyǵy qyzmetkerleri janýardy ormanǵa deıin shyǵaryp saldy. Eliktiń qalaǵa kirýiniń naqty sebebin aıtý qıyn. Buralqy ıtterden qashýy múmkin, qalyń qarǵa baılanysty da osyndaı jaǵdaıǵa tap bolýy yqtımal. Qala aýmaǵynda jabaıy janýardy kórgen turǵyndar atalmysh mekemege, oblystyq tabıǵı resýrstar jáne tabıǵat paıdalanýdy retteý basqarmasyna jáne BQO orman sharýashylyǵy jáne janýarlar dúnıesi aýmaqtyq ınspektsııasyna habarlasa alady, - dedi N.Rahymjanov. 

Eske sala keteıik, budan buryn Batys Qazaqstanda kıik aýlanǵanyn jazǵan edik.