Oralda qaladan 167 myńnan astam tekshe metr qar shyǵaryldy
ORAL. QazAqparat - Oralda 6 qańtar kúngi málimet boıynsha qala aýmaǵynan 167 633 tekshe metr qar shyǵaryldy, dep habarlaıdy «QazAqparat» HAA tilshisi.
Oral qalasy ákimdiginen túsken málimetke qaraǵanda, bul ótken jylǵy osy kezdegiden 4 ese kóp. Kún saıyn kommýnaldyq qyzmet kásiporny 4500-den 5500-ge deıin tekshe metr qar shyǵarýda. Kásiporyn táýlik boıy eki aýysymda qyzmet atqarýda. Kún saıyn 120 arnaıy tehnıka, syıymdylyǵy úlken 90 «KamAZ» kóligi, 300-deı adam qar tazalaýmen aınalysýda. 15 tonna qumdy-tuzdy qospa aldyn ala ázirlendi. Qar tazalaý jumysyn úılestirý úshin qala 20 aýmaqqa bólinip, oǵan ákimdiktiń jaýapty qyzmetkerleri, «Jaıyq Taza Qala» JShS brıgadırleri, jergilikti polıtsııa qyzmetiniń ýchaskelik ınspektorlary bekitilgen. Qajet kezinde qurylys jáne jol paıdalaný kásiporyndarynyń tehnıkalary tartylýda. Degenmen qalanyń keıbir bólikteriniń, úı aýlalarynyń qardan durys tazalanbaýyna baılanysty turǵyndardan az shaǵym túsip jatqan joq. Kóp qabatty úılerdiń tóbesindegi muz súńgileri de qaýip tóndirýde.
«Osyǵan oraı jergilikti polıtsııa qyzmeti, kommýnaldyq kásiporyn, jeke páter ıeleri kooperatıvteri, basqa da múddeli uıymdar basshylary men ókilderiniń basyn qosyp, olarǵa qar tazalaý jumysyn erekshe baqylaýǵa alý tapsyryldy. Sonymen qatar qala turǵyndary da óz aýlasyn qardan tazalaýǵa belsene úles qosqany jón», dedi bul jóninde qala ákimi Narıman Tóreǵalıev.
