Oralda qala kúnine oraı jańa músinder ashyldy
ORAL. QazAqparat - Oralda qala kúnine arnalǵan mádenı-sporttyq sharalar jalǵasýda, dep habarlaıdy «QazAqparat» tilshisi.
Senbi kúni Oral qalasynyń ákimi Murat Muqaev Túrkııanyń Manısa, Reseıdiń Samara, Saratov, Orynbor, Qazaqstannyń Atyraý, Aqtaý qalalarynan kelgen meımandardy qabyldap, qurmet kórsetti.
«Eýropa men Azııanyń túıisken jerinde, úsh ózenniń arasynda ornalasqan Oral qalasy Qazaqstannyń batys qaqpasy bolyp esepteledi. Bastaýyn HІІІ-HV ǵasyrlardaǵy Altyn Orda dáýirinen alatyn Oral búginde Qazaqstannyń qarqyndy damyp kele jatqan qalalarynyń birine aınaldy. Qazirgi tańda Elbasy tapsyrmasyna sáıkes qalada memlekettik baǵdarlamalar aıasynda kóptegen jobalar qolǵa alynyp, keshendi sharalar atqarylýda. Jańa bas josparda áleýmettik, mádenı jáne kásipkerlik nysandaryn salý eskerildi. Jańa shaǵynaýdandar paıda bolyp, sáýletti ǵımarattar boı kóterýde», dedi Murat Rahmetuly.
Qabyldaý kezinde Reseı Federatsııasynyń Oraldaǵy bas konsýly Saıd Zabıtov, Orynbor qalasynyń basshysy Evgenıı Arapov, Atyraý qalasynyń ákimi Serik Shápkenov jáne basqalar óńirdiń bas shaharynyń odan ári órkendeı berýine tilektestigin bildirdi.
Bul kúni Arbat alańynda saǵat, teńge, sý ishetin shúmek, street workout sport alańy ashyldy. Sol sekildi shaǵyn sáýlettik músinder Oraldaǵy jańa alańda da boı kóterdi. Sonyń biri ataqty ánshi Batyrhan Shúkenovtiń qurmetine «Djýlııa» músini (avtory Dmıtrıı Baımuqashev) ornatyldy. Batysqazaqstandyq belgili ánshi Marat Sarbópeevtiń aıtýynsha, munyń sebebi áıgili «Djýlııa» áni «Alma-Ata» (keıin «A-stýdıo») tobynyń 1988 jylǵy shyǵarmashylyq sapary kezinde Oral pedagogıkalyq ınstıtýtynyń (qazirgi M.Ótemisov atyndaǵy BQMÝ) sahnasynda alǵash shyrqalǵan bolatyn. «Djýlııa» músini ashylǵannan keıin munda kezinde Batyrhan Shúkenov shyrqaǵan ánder oryndaldy.
Sondaı-aq bul kúni Jaıyq ózenine Jáńgir han atyndaǵy Batys Qazaqstan agrarlyq-tehnıkalyq ýnıversıteti zerthanasynda ósirilgen bekire balyqtary jiberildi. Sońǵy jyldary atalmysh ýnıversıtet ǵalymdary «Parasat» ulttyq ǵylymı-tehnologııalyq holdıngi» AQ-men birlese otyryp, quryp bara jatqan bekire tuqymdas balyqtardy ósirýdi qolǵa alǵan bolatyn.
Qala kúnine oraı juma kúni keshkisin P.Atoıan atyndaǵy stadıonda jergilikti ónerpazdarmen qatar qazaq estradasynyń juldyzdary Erke Esmahan men Tóreǵalı Tóreáli jáne ıtalıandyq Son Paskal sahnaǵa shyqsa, senbi kúni Abaı atyndaǵy alańda retro-kontsertke kezek keldi. Al jeksenbi kúni osy alańda Qydyráli men Qaraqat óner kórsetetin bolady. Sondaı-aq qalada voleıboldan jasóspirimder arasynda halyqaralyq dástúrli «Dostyq» týrnıri de ótýde.
