Oralda qala kúnine oraı KTK saıysy ótti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynyń amfıteatrynda qala ákiminiń kýbogyna arnalǵan KTK saıysy ótkizildi, dep habarlaıdy «QazAqparat» tilshisi.
«Qazaqstan KVN odaǵy» RJQB prezıdenti, respýblıkalyq «Jaıdarman» ázilkeshter men tapqyrlar saıysynyń júrgizýshisi Esken Eleýken tizginin ustaǵan jarysqa Atyraýdan «Saǵyz», Mańǵystaýdan «Boranqul», Astanadan «Turan-Astana», «Energo», Aqtóbeden «Jem-Saǵyz», Oraldan «Grant», «KazIITÝ quramasy», «Jańa tolqyn», «Oıan» komandalary qatysyp, baq synady.
Tapqyrlar men amfıteatrǵa lyq tolǵan halyqty Oral qalasynyń ákimi Murat Muqaev quttyqtap, ıgi tilegin jetkizdi. «Qala kúnine arnaıy kelgenderińiz úshin alǵysymdy bildiremin, bárińizge sáttilik pen tabys tileımin», dedi ákim.
Sharany uıymdastyrýshy «Ǵasyr» JQB tóraǵasy Bolatbek Sahıevtiń sózine qaraǵanda, mundaı saıys jyl saıyn qala kúni qarsańynda ótedi. Bıyl oǵan «Jaıdarmanǵa» qatysyp júrgen belgili komandalar shaqyryldy. Aıtqandaı, amfıteatrǵa jınalǵan kórermen kúlkige az kenelgen joq. Saıystyń taqyryby da qala kúnine baılanysty boldy.
Jarys qorytyndysynda mańǵystaýlyq «Boranqul» komandasy qala ákiminiń kýbogyn jeńip aldy. Oraldyq «Grant» ekinshi, atyraýlyq «Saǵyz» komandasy úshinshi orynǵa ıe boldy.
