Oralda qala kúnine oraı Depo kópiri ashyldy

Qala ákimi Murat Muqaevtyń aıtýynsha, Elbasy tapsyrmalaryna sáıkes oblys ortalyǵynda kóptegen jumystar qolǵa alynýda. Sonyń biri - osy nysan.

Depo kópiri 1965 jyly salynǵannan beri esh jóndeý kórmeı, ábden tozyǵy jetken bolatyn. Sondyqtan 2016 jyldyń naýryzynan ony buzý jumystary qolǵa alynyp, maýsym aıynda qurylysy qolǵa alyndy. Eki jylǵa eseptelgen kúrdeli jóndeý jumysy alty aı buryn aıaqtaldy.

Kópir «QPO b.v.» kompanııasynyń qarjysyna salyndy. Joba quny - 2,3 mlrd teńge. Merdigeri - «KA-STROI LTD» kompanııasy. Nysandy salýǵa seksennen astam adam, 30 tehnıka tartyldy. Qurylysqa otandyq óndirýshilerdiń materıaldary paıdalanyldy.

Ákimniń sózine qaraǵanda, kópir ótkeliniń jalpy uzyndyǵy 536 metr, kireberis joldarymen 628 metrge jetedi. Qurylys aıaqtalǵan soń kólikke arnalǵan jol 7,5-ten 14 metrge, trotýardyń eni 1 metrden 1,5 metrge, kópirdiń jalpy jalpaqtyǵy 12 metrden 20 metrge deıin ulǵaıdy. Buryn jol qos jolaqty bolsa, qazir tórt jolaqtyǵa aınalyp,18 jaryq baǵandary ornatyldy, Bylaısha aıtqanda, kólik ótkizý múmkindigi eki esege  ósti.
 

2000 jyly Oral qalasynyń halqy 210 myń bolsa, kúni búgin 330 myńǵa jetti. Soǵan sáıkes kólik sany da kóbeıip otyr.

Jyl sońyna deıin «Omega» zaýyty aýdanyndaǵy kópir de buzylatyn bolady. Bul kópir qurylysy kelesi jyly kóktemde bastalady.

Aıta keteıik, apta boıy Oralda qala kúnine arnalǵan sharalar ótýde.