Oralda qala kúnine oraı birneshe nysan ashyldy
ORAL. 1 qazan. QazAqparat - QazAqparat budan buryn habarlaǵanyndaı, 29-30 qyrkúıekte Oralda qala kúni keńinen toılanyp ótti.
Bıylǵy qala kúniniń bir ereksheligi, Nazarbaevtyń zııatkerlik mektebi, birneshe baq, balalar sport alańdarymen qatar Abaı alańynda shaharǵa sán beretin bıik tuǵyrly saǵat saltanatty túrde ashyldy.
Túrli ult ókilderi ulttyq kıimderimen kórinister qoıyp, shahar kóshelerin án-kúıge bóledi. Olar merekege kelgen qala qonaqtaryn ulttyq taǵamdaryn jaınatyp, qushaq jaıa qarsy aldy. J.Moldaǵalıev baǵyndaǵy, Dostyq dańǵylynan Qurmanǵazy kóshesine deıin sozylǵan túrli kórmeni oblys, qala basshylary men meımandar tamashalady. Oqý oryndary ujymdary men jekelegen qolóner sheberleri buıymdaryn, jeke kásipkerler óz ónimderin jurtshylyq nazaryna usyndy.
Oblys ákimi Nurlan Noǵaevtyń atap ótkenindeı, Oral - Qazaqstandaǵy ejelgi de ásem qalalardyń biri. Qalanyń ósip-órkendeýine ardager aǵa urpaq qalaı óz úlesterin qossa, keıingi jastar da shahardy odan ári kórkeıtýge úles qosýda. Kelgen qonaqtar qalanyń ádemiligine súısinip, tazalyǵyn maqtap jatady. Qazirgi tańda qalanyń qaı buryshynan bolsa da jańa ǵımarattar boı kóterýde.
Abaı alańynda qazaqstandyq jáne reseılik estrada juldyzdarynyń qatysýymen kontsert qoıylsa, qala alańdarynda mádenı sharalar jeksenbi kúni de jalǵasyn tapty.
