Oralda Ivan Gapıchke Altyn juldyz ben «Otan» ordeni tabys etildi

ORAL. QazAqparat – Batys Qazaqstan oblysy ákimdiginde soǵys jáne prokýratýra ardageri Ivan Gapıchke Altyn juldyz ben «Otan» ordeni tabys etildi, dep habarlaıdy QazAqparat tilshisi.

QR Prezıdenti Qasym-Jomart Toqaev eki maıdangerge «Halyq qaharmany» ataǵyn berip, olardy aıryqsha erekshelik belgisi – Altyn juldyz ben «Otan» ordenimen marapattaǵanyn buǵan deıin jazǵan bolatynbyz.

Saltanatty rásimde oblys ákimi Narıman Tóreǵalıev jıynǵa qatysýshylardy Otan qorǵaýshy jáne Jeńis kúnimen quttyqtady.

«Qazaq dalasyn soǵys oty sharpymaǵanymen, qabyrǵasy qaıyspaǵan shańyraq qalǵan emes. Soǵysty estý ońaı bolǵanymen, kórý qıyn. Ony soǵys jyldary ot keshken ardagerlerimiz jaqsy biledi. Jaý áskeriniń tabany qazaq jerine tımese de, soǵystyń alapat órti oblysymyzdyń Jánibek, Bókeı ordasy aýdandaryn sharpyp ótti. Batys Qazaqstan oblysynan maıdanǵa 76 myń jaýynger attanyp, olardyń 36 myńy urys alańynda erlikpen qaza tapty. Bizdiń óńirdiń soǵys kezinde maıdan shebindegi aımaq retinde Uly Jeńiske qosqan úlesi zor. Maıdanda atalarymyz jaýmen alyssa, tylda analarymyz aıanbaı eńbek etti», dedi óńir basshysy.

Budan keıin oblys ákimi Memleket basshysy Qasym-Jomart Kemeluly Toqaev óńirge jumys sapary kezinde Ivan Stepanovıch Gapıchti ǵasyrlyq mereıtoıymen quttyqtap, qurmet kórsetkenin atap ótti.

«Qadirli Ivan Stepanovıch! Sizdi soǵys kezindegi erligińiz jáne beıbit kezdegi eńbegińiz úshin «Halyq qaharmany» atanýyńyzben quttyqtaımyn», degen Narıman Tóreǵalıev maıdangerge «Altyn juldyz» ben «Otan» ordenin tapsyrdy.

«Prezıdentke meniń Jeńiske qosqan úlesim men prokýratýra salasyndaǵy uzaq jylǵy eńbegimdi joǵary baǵalaǵany úshin alǵysymdy aıtamyn. Bul ataq Uly Jeńistiń 78 jyldyǵyna jáne jýyrda atap ótken 100 jyldyq mereıtoıyma oraı berilip otyr dep oılaımyn. Prezıdentimiz Qasym Jomart Kemelulyn Joǵary bas qolbasshy retinde merekemen quttyqtap, oǵan myqty densaýlyq, barlyq bastamalary men eńbegine tabys pen sáttilik tileımin. Elimizde tek beıbitshilik pen tynyshtyq saltanat qura bersin. Otanyma budan bylaı da adal qyzmet ete beremin», dedi Ivan Gapıch.

Saltanatty jıynda ólketanýshy, eńbek ardageri Jaısań Aqbaı, prokýratýra salasynyń ardagerleri Jeńis Qapezov pen Sholpan Shońaeva Ivan Stepanovıch týraly jyly lebizderin bildirdi.

Eske sala keteıik, buǵan deıin Jeńis sherýine qatysqan batysqazaqstandyq maıdangerdiń 100 jasqa tolǵanyn jazǵan edik.