Oralda ıttiń kómegimen joǵalǵan qyz tabyldy
ORAL. QazAqparat - Oralda 5517-áskerı bólimniń kınology, serjant Baqtyǵalı Áıkenov ıttiń kómegimen joǵalǵan qyzdy tapty, dep habarlaıdy «QazAqparat» tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, 23 jeltoqsan kúni saǵat keshki 20.00 shamasynda «Soltústik-Shyǵys» shaǵynaýdanynda I. degen azamatsha úsh jasar qyzy joǵalǵany jóninde quramynda kishi serjant Ashat Shalabaev, kınolog, serjant Baqtyǵalı Áıkenov jáne qatardaǵy jaýynger Roman Rıazanov bar topqa aıtyp, kómektesýin ótingen. Áıel Ábilqaıyr kóshesi boıyndaǵy «Kerýen» dúkenine kirip, zattardy qarap jatqan mezgilde kishkentaı Iradanyń shyǵyp ketkenin baıqamaı qalǵan. B.Áıkenov anasynan qyzdyń qolǵabyn alyp, Sherıf esimdi ıtke ıisketip, izine túsken. 15 mınýttan keıin qyzmettik ıt kınologty E.Oraqbaev atyndaǵy kósheniń boıyndaǵy 8-úıge alyp kelgen. Qoryqqan qyz jan-jaǵyna qarap, sol jerde turǵan.
Qyzdyń anasy Indıra Nurjanova Ulttyq ulan jaýyngerleriniń qyraǵylyq kórsetkeni úshin «Batys» óńirlik qolbasshysy, general-maıor Álibek Serálıevtiń atyna hat jazyp, alǵysyn bildirdi.
Atalǵan jaýyngerler áskerı bólim basshylyǵymen yntalandyryldy.
