Oralda Isataı men Mahambet batyrlarǵa eskertkish ornatyldy
Eńseli eskertkish shaharǵa kirer tusta, Shaǵan ózeninen ótetin kópirdiń aldynda boı kóterdi.
«Rýhanı jańǵyrý» baǵdarlamasy aıasynda qolǵa alynǵan kompozıtsııanyń bıiktigi – 13 metr, 5,5 metrlik músinder qoladan quıylsa, 7,5 metrlik tuǵyry granıtten jasalǵan.
Kompozıtsııa avtorlary – Nur-Sultan qalasynyń músinshileri Serik Rústembekov, Rınat Ábenov jáne Erbol Zııabekov.
Eskertkishtiń ashylý rásimine qatysqan oblys ákimi Ǵalı Esqalıevtiń atap ótkenindeı, qos batyr Isataı men Mahambet qandaı qurmetke de laıyq.
Prezıdent Qasym-Jomart Toqaev jýyrda ótken «Ulytaý – 2019» halyqaralyq týrıstik forýmynda «Tarıhtyń, tarıhı tulǵalardyń qadir-qasıetin baǵalaı bilý – barshamyzdyń ortaq paryzymyz» degen bolatyn.
Er Isataı qalyń qoldy bastap, azattyq jolynda kúresse, onyń serigi, uly aqynymyz Mahambettiń órshil óleńderin tebirenbeı oqý múmkin emes.
«Qanatynan daýyl esetin qos qyrandaı jaýǵa tıgen Isataı men Mahambettiń esimi máńgi óshpek emes. Qos batyrdyń eskertkishi ornatylǵan osynaý jer qasterli de qasıetti orynǵa aınalary haq!» dedi óńir basshysy.
«Qazaqtyń qos qyrany Isataı men Mahambet týǵan elge, Otanǵa, ultqa qalaı qyzmet etýdiń úlgisin kórsetti. Erkindik ańsaǵan halyq uldaryna Isataı, Mahambet dep at qoıyp, keleshekke úmit artty. Endeshe, olardy umytýǵa halyqtyń da, tarıhtyń da qaqy joq edi. Dál osy jerge tabany tıgen Mahambet Edil-Jaıyq boıyna el qondyryp, aq ordaǵa eńkeımeı kirsem dep jyrlap edi. Sol erkindikke qol jetkizip otyrǵan búgingi urpaq, ár adam babalar aldynda ózin jaýaptymyn dep esepteýi kerek. «Babalar aldyndaǵy, rýh aldyndaǵy boryshymdy atqaryp júrmin be, joqpyn ba» dep oılaýy kerek. Bul – árkimniń boryshy. Sol úshin eskertkish qoıyldy. Eń bastysy, rýh ólmeýi kerek. Rýhy joq ultty kim kóringen mazaq etedi. Mine, sol rýhty kóterý úshin salynyp otyr eskertkish. Erkindigimiz baıandy bolsyn, aǵaıyn!» dedi aqyn, Memlekettik syılyqtyń ıegeri Aqushtap Baqtygereva.
M.Ótemisov atyndaǵy Batys Qazaqstan memlekettik ýnıversıteti «Qazaqstan tarıhy jáne ólketaný» ǵylymı ortalyǵynyń jetekshisi, tarıh ǵylymdarynyń kandıdaty Jańabek Jaqsyǵalıev táýelsizdikke Isataı men Mahambetteı batyrlardyń ǵasyrlarǵa sozylǵan azattyq kúresi arqyly qol jetkendigine toqtaldy.
Isataı men Mahambet eskertkishiniń ashylýyna oraı H.Bókeeva atyndaǵy oblystyq qazaq drama teatrynda «Babalardyń órshil rýhy óshpeıdi» atty respýblıkalyq ǵylymı-tájirıbelik konferentsııa uıymdastyryldy.
Onda tarıhshy-ǵalym Jańabek Jaqsyǵalıev Isataı batyrdyń Jáńgir hannyń ordasyn shappaýynyń sebepterin jańasha kózqaras turǵysynan saralap berdi.
Almatydan kelgen «Arys» qorynyń dırektory, saıası qýǵyn-súrgin qurbandary mýzeıiniń meńgerýshisi, fılologııa ǵylymdarynyń doktory Ǵarıfolla Ánes «Mahambet» entsıklopedııasyn shyǵarýdyń ýaqyty jetkendigin, ony sonaý Noǵaıly dáýirinen bastap aýqymdy túrde qolǵa alýdyń qajettigin aıtty.
Qazaqstannyń eńbek sińirgen qaıratkeri, Qurmanǵazy atyndaǵy ulttyq konservatorııanyń professory, ónertaný kandıdaty Karıma Saharbaeva Mahambet Ótemisulynyń mýzykalyq murasynyń da mol ekendigin tarqatsa, ólketanýshy, Jáńgir han atyndaǵy tarıhı-etnografııalyq mýzeıiniń meńgerýshisi Nurjan Tólepov Isataıdyń qaza tabýyna baılanysty óz oı-tolǵamyn bildirdi.
Eske sala keteıik , budan buryn Oralda Isataı-Mahambetke eńseli eskertkish ornatylatynyn jazǵan bolatynbyz.
