Oralda Isataı-Mahambettiń eńseli eskertkishi ornatylady
ORAL. QazAqparat - Oralda Isataı-Mahambettiń eńseli eskertkishi ornatylmaq. Bul týraly qala ákimi Murat Muqaev zııaly qaýym ókilderimen kezdesýde málim etti, dep habarlaıdy QazAqparat tilshisi.
Onyń aıtýynsha, óńir basshysy Altaı Kólginovtiń qoldaýymen qarjy máselesi tolyqtaı sheshildi.
«Eskertkishti qaı jerde ornatý máselesi buǵan deıin de talqylanyp, túrli pikirler aıtyldy. Barlyǵy 11 oryn qaraldy. Áıtse de, eskertkish aýqymdy, bıiktigi shamamen bes qabatty úımen deńgeıles bolǵandyqtan, kópshiligi sáıkes kelmedi. Mundaı monýmentaldy eskertkishterdi shahardyń kireberisine ornatý kóp qalanyń tájirıbesinde bar. Mysaly, Bashqurtstan astanasy Ýfadaǵy ózen jaǵasynda turǵan Salaýat ıÝlaev, Almaty oblysyndaǵy Naýryzbaı batyr, Ulan-Batyrdan bir saǵattyq joldaǵy ústirtte ornalasqan Shyńǵys han eskertkishterin aıtýǵa bolady. Osy tájirıbeni eskere otyryp, Isataı-Mahambet eskertkishin qala men Zachagan kenti aralyǵyndaǵy Shaǵan ózeninen ótetin kópirdiń aldyna ornatý kózdelip otyr. Bul oryn tar bolmaıdy. Óıtkeni, 2019 jyly qalanyń bas josparyna tolyqtyrý engizip, eskertkish ornatylatyn orynnyń eki jaǵyndaǵy ózen jaıylmalaryn bıiktetip, saıabaq jasaý kózdelgen. Jaıaý kópir, avtoturaqtar salý da oılastyrylady.
Ekinshiden, osy jermen ótetin Chagano-Naberejnaıa kóshesin Isataı-Mahambet dep ataý jóninde usynys bar. Bolashaqta bul uzyn kósheni dańǵylǵa aınaldyrýǵa bolady. Segiz birdeı baǵytta avtobýs qatynaıtyn Zachagan arqyly Atyraý, Saratov oblystaryna jáne Batys Qazaqstannyń ońtústik aýdandaryna jol shyǵady. Zachagan kenti men jańadan boı kóterip jatqan «Aqjaıyq» shaǵynaýdanynda aldaǵy ýaqytta 150 myńǵa jýyq halyq turatyn bolady. Mine, qalaǵa keletin qonaqtar ǵana emes, turǵyndar da kún saıyn Isataı-Mahambet eskertkishine kóz salyp kete alady», - dedi Murat Rahmetuly.
Jıynda qalalyq ardagerler keńesiniń tóraǵasy Kenjebaı Nyǵmet, «Qazaqstan» ulttyq arnasy BQO fılıalynyń dırektory Aslanbek Ǵubashev, aqyn-jazýshylar Baýyrjan Ǵubaıdýllın, Munaıdar Balmolda, teatr qyzmetkeri Nurlan Sádir, qurylysshy Baqytjan Nurbaev jáne basqalar shahar basshysynyń sózin qoldap, óz usynys-pikirlerin bildirdi.
Atalǵan orynnan M.Ótemisov atyndaǵy Batys Qazaqstan memlekettik ýnıversıteti qashyq emes. Sondyqtan ýnıversıtet ataýyn da Isataı-Mahambet dep ózgertse, artyqtyq etpeıdi. Eskertkish aldyndaǵy alańqaıdy 150 adam syıatyndaı etip keńeıtip, patrıottyq baǵytta sharalar ótkizetin orynǵa aınaldyrýǵa bolady. Osy aralyqqa tıip turǵan Han toǵaıyn jańǵyrtý sharalary qolǵa alynsa degen usynys ta aıtyldy.
«Munyń bári jumys barysynda eskeriledi. Eskertkish jobasy QR Mádenıet jáne sport mınıstrligi tarapynan qoldaý tapty. Endigi másele isti sátimen bitirýde», - dep qorytty M.Muqaev.
