Oralda Isataı-Mahambetke eskertkish ornatylady
ORAL. QazAqparat - Oralda Isataı-Mahambetke eskertkish ornatylady. Bul týraly búgin «Rýhanı qazyna» oblystyq festıvalinde óńir basshysy Altaı Kólginov málim etti, dep habarlaıdy QazAqparat tilshisi.
Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasynyń bir jyldyǵyna oraılastyrylǵan mádenıet jáne óner salasy uıymdary men qyzmetkerleriniń festıvaline qatysqan oblys ákimi osy ýaqyt ishinde óńirde atqarylǵan ister men alda turǵan maqsat-mindetterge toqtaldy.
Onyń aıtýynsha, Isataı men Mahambet eskertkishine baılanysty jergilikti, sondaı-aq respýblıkalyq deńgeıdegi músinshilerdiń usynystary jınaqtalady. 
«Sodan keıin tarıh, mádenıet, óner salasynyń ardagerleri mamandarmen aqyldasa otyryp, bir mámilege kelemiz. Sosyn Mádenıet jáne sport mınıstrliginde jobany bekitkennen keıin eskertkishti bıyl turǵyzbaq oıymyz bar. Qarajat máselesi sheshildi, endi orny belgilenedi», dedi Altaı Kólginov.
Óńir basshysy sonymen qatar ıÝNESKO deńgeıinde toılanatyn Qurmanǵazynyń 200 jyldyǵyna oraı úlken ekspedıtsııa uıymdastyrylyp jatqanyn jetkizdi. Osy sáýir aıynda Qurmanǵazynyń ustazy Uzaq kúıshi jerlengen Qaratóbe aýdanynan bastalatyn joryq Jańaqala, Bókeı ordasy arqyly Astrahandaǵy kúı atasy jatqan Altynjarda qorytyndylanady.
«Rýhanı jańǵyrý» baǵdarlamasy aıasynda birlesip atqaratyn jumystarymyz kóp. Sonyń ishinde Bókeı ordasy tarıhı-mýzeı keshenin tabıǵı qoryqqa aınaldyrý, Jaıyq qalashyǵyn aspan astyndaǵy mýzeı jasaý sekildi uzaq merzimdi jobalar bar. Bizdiń ólkemizdiń tarıhy óte baı.
Sondyqtan Reseı, Qytaı, Túrkııa jáne basqa elderde qalǵan derekterdi jınastyryp, birneshe tomdyq kitap ta shyǵarǵymyz keledi», dedi ákim.
Festıval barysynda oblystyq baıqaýda úzdik shyqqandar túrli atalymdar boıynsha marapattaldy.
