Oralda iri kólemde alaıaqtyq jasaǵan polıtsııa ofıtseri sottaldy
ORAL. QazAqparat - Oral qalalyq sotynyń úkimimen N.Ǵınaıatov QR QK 190-baby 3-bóligi 1, 2-tarmaqtaryna sáıkes (qyzmet babyn paıdalana otyryp, iri kólemde jasalǵan alaıaqtyq) kináli dep tanylyp, oǵan múlkin tárkileýmen birge 3 jylǵa bas bostandyǵynan aıyrý jazasy belgilendi, dep habarlaıdy «QazAqparat» tilshisi.
Oral qalalyq sotynan túsken málimetke qaraǵanda, «Qazaqstan Respýblıkasy Táýelsizdiginiń jıyrma bes jyldyǵyna oraı raqymshylyq jasaý týraly» QR Zańy 4-baby 2-bóligine sáıkes negizgi jaza merziminiń ótelmegen bóliginiń tórtten biri qysqartylyp, qalǵan ýaqyty 2 jyl 3 aı dep sanaldy. Qylmystyq atqarý júıesiniń orta qaýipsizdik mekemesi jazany óteý orny retinde belgilendi.
N.Ǵınaıatov sonymen qatar ómir boıyna quqyq qorǵaý organdarynda qyzmet atqarý quqyǵynan jáne polıtsııa maıory sheninen aıyryldy.
Sot úkim shyǵarǵan kezde onyń buryn sottalmaǵanyn, asyraýynda kámeletke tolmaǵan balasy bar ekenin, kinásin moıyndaǵanyn eskerdi.
Sot talqysynda belgili bolǵanyndaı, N.Ǵınaıatov Oral qalalyq ishki ister basqarmasy tergeý bólimi bastyǵynyń orynbasary laýazymyn atqara otyryp, aldaý jáne senimdi teris paıdalaný jolymen adamdar tobynyń aldyn ala sóz baılasyp, avtokólikti jasyryn urlaýyna qatysty qozǵalǵan qylmystyq is boıynsha oń sheshim qabyldaýǵa kómektesemin dep, 2 mln. teńge alǵan.
Sot úkimi zańdy kúshine engen joq.
