Oralda Iran-Ǵaıyptyń teatrlar festıvali «Án-Muhıt» dramalyq dastanymen ashyldy
ORAL. QazAqparat - Batys Qazaqstan oblystyq qazaq drama teatrynda Qazaqstan táýelsizdiginiń 25 jyldyǵyna arnalǵan belgili aqyn-dramatýrg, Memlekettik syılyqtyń laýreaty, halyqaralyq «Alash» jáne táýelsiz «Tarlan» syılyqtarynyń ıegeri Iran-Ǵaıyptyń (Iranbek Orazbaev) «Máńgilik eldiń altyn adamy» atty respýblıkalyq teatrlar festıvali ótýde, dep habarlaıdy QazAqparat.
Festıvaldiń ashylý saltanatynda Batys Qazaqstan oblysynyń ákimi Altaı Kólginov osynaý óner dodasyna Mońǵolııa, Makedonııadan, sonymen qatar elimiz qalalarynan kelgen mártebeli meımandar men teatrlar ujymdaryna rızashylyǵyn bildirdi. Osy shara kezinde Makedonııadan kelgen antıkalyq drama teatrynyń akteri, «Stobı - 2016» antıkalyq drama festıvaliniń dırektory Zoran Ltýkov jýyrda atalmysh óner dodasynda Evrıpıdtiń «Troıa arýlarymen» jeńimpaz atanǵan Batys Qazaqstan oblystyq qazaq drama teatrynyń ujymyna (dırektory Qýanysh Amandyqov) bas júldeni tabys etti. Oǵan qosa sol spektakldi qoıǵan tarazdyq tanymal rejısser, Sh.Aıtmatov atyndaǵy halyqaralyq syılyqtyń laýreaty Qýandyq Qasymovqa «Eń úzdik rejıssýra», Gekýba rolinde oınaǵan Qazaqstannyń eńbek sińirgen qaıratkeri, teatrdyń kórkemdik jetekshisi Bıbigúl Esalıevaǵa «Eń úzdik áıel obrazy» júldesi tapsyryldy.
Sodan keıin Iran-Ǵaıyptyń teatr festıvali ári Batys Qazaqstan oblystyq qazaq drama teatrynyń HHІV maýsymy «Án-Muhıt» dramalyq dastanynyń premerasymen ashyldy. Atalmysh shyǵarmany Iran-Ǵaıyp halyq kompozıtory, aqyn ári ánshi Muhıt Meráliniń 175 jyldyǵyna arnap jazǵan bolatyn. QR eńbek sińirgen ártisi, «Qurmet» ordeniniń ıegeri Murat Ahmanov pen teatrdyń bas rejısseri Muqanǵalı Tomanov sahnalaǵan spektakl alty alashqa án ozdyrǵan ataqty Muhıttyń ómiri men shyǵarmashylyǵynan syr shertedi. Muhıt beınesinde sahnaǵa mádenıet salasynyń úzdigi Musaǵalı Bektenov shyqsa, Jambyl Zaev Ájigereı, mádenıet salasynyń taǵy bir úzdigi Temirjan Mataev Muhtar, Qazaqstannyń eńbek sińirgen qaıratkeri Bıbigúl Esalıeva Qyrmyzy, Aıjan Qaıyrova Aqıistiń rolin somdady. Sol sekildi Aqmaral Amandyqova, Jylqybaı Jubatov, Erkin Tasbolatov, Qazaqstannyń eńbek sińirgen ártisi, Memlekettik syılyqtyń laýreaty Serdesh Qajymuratov, Samal Ábýov, mádenıet salasynyń úzdigi Nurlygúl Jubatova óz rolderin alyp shyǵa bildi. Al BQO mádenıet, muraǵattar jáne qujattama basqarmasynyń basshysy Dáýletkereı Qusaıynov pen óńirge tanymal dombyrashy Edige Nábıev qoıylymǵa kúıshiler retinde qatysty.
Spektakl sońynda týyndy avtory Iran-Ǵaıyp batysqazaqstandyq teatr ujymyna rızashylyǵyn bildirdi.
Aıta keteıik, 27 qazanda márege jetetin atalmysh festıvalge Ǵ.Músirepov atyndaǵy Qazaq memlekettik akademııalyq balalar jáne jasóspirimder teatry, Shyǵys Qazaqstan oblysy Semeıdiń Abaı atyndaǵy memlekettik qazaq mýzykalyq drama teatry, Ońtústik Qazaqstan oblystyq orys drama teatry óz qoıylymdarymen qatysýda.
