Oralda Iran-Ǵaıyptyń respýblıkalyq teatrlar festıvali márege jetti
ORAL. QazAqparat - 27 qazan kúni Batys Qazaqstan oblystyq qazaq drama teatrynda Qazaqstan táýelsizdiginiń 25 jyldyǵyna arnalǵan aqyn-dramatýrg, Memlekettik syılyqtyń laýreaty, halyqaralyq «Alash» jáne táýelsiz «Tarlan» syılyqtarynyń ıegeri Iran-Ǵaıyptyń (Iranbek Orazbaev) «Máńgilik eldiń altyn adamy» atty respýblıkalyq teatrlar festıvali márege jetti, dep habarlaıdy QazAqparat.
Iran-Ǵaıyptyń óner keshinde aldymen aqynnyń ózi óleńderin oqyp, osyndaı teatr festıvalin uıymdastyryp, oǵan qoldaý kórsetken Batys Qazaqstan oblysy basshylyǵyna, Aq Jaıyq jurtshylyǵyna alǵysyn bildirdi. Kesh barysynda Almatydan arnaıy kelgen saksofonshylar, aqyn-dramatýrgtiń uly Jaıynshah pen onyń ustazy Konstantın Dobrovolskıı, qaryndasy Raıa Orazbaeva men jıeni, belgili estrada ánshisi, «Túrkvıjn-2014» halyqaralyq festıvaliniń jeńimpazy Janar Duǵalova, sondaı-aq Batys Qazaqstan oblystyq qazaq drama teatrynyń ártisteri, Qazaqstannyń eńbek sińirgen qaıratkeri Erbol Esendosov, teatr dırektory Qýanysh Amandyqov óz ónerlerin kórsetti.
«Meniń teatrmen bite-qaınasyp ketkenime jıyrma jyldan asty. Qazirgi bar jubanysh-qýanyshym teatr dese de bolady. Oralda alty kúnniń ishinde on týyndym qoıylyp, Qazaqstan táýelsizdiginiń 25 jyldyǵy qarsańynda shyǵarmashylyǵymnyń bir kezeńine esep bergendeı boldym. Sol úshin osy festıvalge qatysqan barlyq teatrǵa, bizdi qushaq jaıyp, qarsylaǵan Aq Jaıyq eline rızamyn», dedi Iran-Ǵaıyp.
Kesh sońynda oblys ákiminiń orynbasary Marat Toqjanov Iran-Ǵaıyp bastaǵan festıval qonaqtaryna, qatysýshylarǵa alǵysyn bildirdi.
Qazylar alqasynyń sheshiminen Batys Qazaqstan oblystyq qazaq drama teatry sahnalaǵan «Máńgilik eldiń altyn adamy» spektakli «Eń úzdik qoıylym» dep tanyldy. Onyń rejısseri, belgili teatr jáne kıno akteri, Qazaqstannyń eńbek sińirgen ártisi, «Qurmet» ordeniniń ıegeri Murat Ahmanov «Úzdik rejıssýra» atalymyn ıelendi. Ǵ.Músirepov atyndaǵy qazaq memlekettik akademııalyq balalar men jasóspirimder teatrynyń aktrısasy Aqbota Qaımaqbaeva «Fatıma» spektaklindegi Fatıma, batysqazaqstandyq teatrdan Nurlygúl Jubatova «Máńgilik eldiń altyn adamyndaǵy» Qazyna róli úshin «Úzdik áıel beınesi», Abaı atyndaǵy Semeı memlekettik qazaq mýzykalyq drama teatrynyń akteri Baýyrjan Tólekov «Adasqan baq qusyndaǵy» Keriketkendi sheber somdaǵany úshin «Úzdik er adam beınesi» atalymymen marapattaldy. Oǵan qosa bir top teatr rejısser-akterleri «Táýelsizdikke taǵzym», «Máńgilik el» atalymdary boıynsha atalyp ótildi. Olardyń ishinde BQO teatrynyń bas rejısseri Muqanǵalı Tomanov, beldi akterleri Serdesh Qajymuratov, Musaǵalı Bektenov, Erbol Esendosov, sýretshisi Qaıyr Orazǵalıev bar.
