Oralda ınvestorlardyń qatysýymen eki iri joba júzege asyrylmaq
ORAL. QazAqparat - Oralda ınvestorlardyń qatysýymen eki iri joba júzege asyrylmaq. Bul týraly oblys ákimi Altaı Kólginovtiń tóraǵalyǵymen ótken ınvestıtsııalardy tartý jáne BQO ınvestıtsııalyq ahýalyn jaqsartý jónindegi óńirlik keńestiń kezekti otyrysynda málim etildi, dep habarlaıdy QazAqparat tilshisi.
Jıynda belgili bolǵanyndaı, úsh jyl ishinde qatty turmystyq qaldyqtardy basqarý júıesi boıynsha keshen jumys jasaı bastamaqshy. Sondaı-aq taıaýdaǵy eki jylda oblys ortalyǵynda qazirgi zamanǵy bıznes ortalyǵy bar halyqaralyq deńgeıdegi qonaqúı kesheni salynbaqshy.
Otyrysta fınlıandııalyq «Green Servise Company» JShS Baltic trade house basqarma múshesi Kalver Kapper turmystyq qaldyqtardy qaıta óńdeý kesheni jóninde áńgimelep berdi.
Onyń aıtýynsha, Fınlıandııada turmystyq qaldyqtyń 98 paıyzy óńdeledi. Sondyqtan qaıta óńdeý kesheniniń jumysyn qamtamasyz etý úshin turmystyq qaldyqtardy keıde basqa elderden satyp alýǵa týra keledi. Oraldaǵy keshen qurylysyna 4,5 mln astam eýro salynbaqshy.
«Green Servise Company» kompanııasy mundaı jobalardy Reseıdiń Omby, Sankt-Peterbor, Novosibir qalalarynda júzege asyrǵan. Qazaqstanda alǵash Oraldan bastaǵaly otyr.
Oblys basshysy bul turmystyq qaldyqtardy paıdaǵa asyrý baǵytyndaǵy jańa tásil ekendigin atap ótip, fındermen birge túrli salada birneshe iri joba qolǵa alynǵanyn, sondyqtan olarda jumystyń qalaı jolǵa qoıylǵanyn kózben kórip qaıtý úshin osy elge sapar uıymdastyrý kózdelip otyrǵanyn jetkizdi.
Halyqaralyq deńgeıdegi qonaqúı kesheni jobasymen "GRAND HOTEL Service" JShS dırektory Jaqsylyq Samatov tanystyrdy. Onyń sózine qaraǵanda, jańa meıramhana Qurmanǵazy kóshesi 84-mekenjaıynda, burynǵy «Aqjaıyq» qonaqúıiniń ornynda boı kótermekshi. Munda qonaqúı kesheni 8200 sharshy metrge ornalassa, qazirgi zamanǵy bıznes ortalyǵy aýmaǵy 4200 sharshy metr bolmaq.
Qonaqúı kesheni qurylysy kezinde 300 jańa jumys orny ashylmaq. Al qurylys bitkennen keıin 200-deı jumys qoly kerek bolady. Ǵımaratty salǵan kezde otandyq qurylys materıaldaryn paıdalaný kózdelýde. Sol sekildi 8 qabatty bıznes ortalyǵy halyqaralyq talaptarǵa sáıkes bolmaq.
Qonaqúı qurylysyna 12 mln AQSh dollaryn tartý josparlanýda.
