Oralda ınvestorǵa zańsyz salynǵan 33 mln teńge aıyppul joıyldy

ASTANA. KAZINFORM – Oral qalasynyń prokýratýrasy «K5 ekologııalyq klasty motor otyndaryn óndirýdi jańǵyrtý» ınvestıtsııalyq jobasyn iske asyryp jatqan «Kondensat» AQ-nyń buzylǵan quqyqtaryn qalpyna keltirdi.

Vedomstvonyń málimetinshe, sot aktisin zerdeleý barysynda ınvestordyń negizsiz ákimshilik jaýapkershilikke tartylǵany anyqtalǵan.

- Atap aıtqanda, valıýtalyq túsimdi repatrıatsııalaý talaptaryn oryndamaǵany úshin «Kondensat» AQ sot qaýlysymen Ákimshilik quqyq buzýshylyq týraly kodekstiń 251-babynyń 2-tarmaǵy boıynsha 33 mln teńge kóleminde aıyppul salýmen ákimshilik jaýapkershilikke tartylǵan, delingen habarlamada.

Alaıda is materıaldaryn zerdeleý nátıjesinde «Kondensat» AQ sheteldik kontragentpen 32 mln Reseı rýblinen (163 mln teńgeden astam) asatyn soma boıynsha mindettemelerin Qazaqstan Respýblıkasynyń valıýtalyq zańnamasyna tolyq sáıkes oryndaǵany belgili boldy. Osylaısha, ınvestordy jaýapkershilikke tartýǵa zańdy negiz bolmaǵan.

- Qala prokýratýrasynyń apellıatsııalyq ótinishi boıynsha Batys Qazaqstan oblystyq sotynyń sot alqasy is júrgizýdi toqtatyp, zańsyz sot aktisiniń kúshin joıdy», – dep atap ótti Oral prokýratýrasy.

Vedomstvo ınvestorlardyń quqyqtary men zańdy múddelerin qorǵaý boıynsha júıeli jumysty jalǵastyratynyn habarlady.

Aıta keteıik, BQO-da alaıaqtarǵa járdemdesken eki turǵynnan 1,5 mln astam teńge óndirildi.