Oralda «Invataksı» qyzmetine bólingen 53 mln teńgeni jymqyrǵandar tergelip jatyr

ORAL. KAZINFORM — Oral qalasynda asa iri kólemde bıýdjet qarajatyn jymqyrýǵa baılanysty tergeý amaldary júrgizilip jatyr.

BQO boıynsha Ekonomıkalyq tergep-tekserý departamentiniń baspasóz qyzmetinen málim etkenindeı, «Belyı parýs» múgedekter qoǵamdyq birlestiginiń basshysy M.Karabınov jáne Oral qalasy jumyspen qamtý jáne áleýmettik baǵdarlamalar bóliminiń laýazymdy tulǵalary 2023 jylǵy memlekettik áleýmettik tapsyrys sheńberinde oblys ortalyǵy men oǵan irgeles kenttik okrýgtar aýmaǵynda «Invataksı» qyzmetin kórsetýge bólingen jalpy somasy 53 mln 553,3 myń teńge bıýdjet qarajatyn jymqyrdy degen kúdikke ilingen.

Іs ishki memlekettik aýdıt departamentiniń qorytyndysy negizinde tirkelgen. Osyǵan oraı istiń mán-jaıyn jan-jaqty, tolyq jáne obektıvti tergeýdi qamtamsyz etýge baǵyttalǵan áreketter júrgizilip jatyr.

«Departament «Belyı parýs» múgedekter qoǵamdyq birlestiginiń keńsesinde kezek kúttirmeıtin tergeý áreketteriniń júrgizilgenin rastaı otyryp, osy tusta birlestiktiń jumys barysyna kedergi keltiretin eshbir tehnıka keńseden tárkilenbegenin, sondaı-aq atalmysh uıymnyń qyzmeti toqtatylmaǵanyn habarlaıdy. Ózge málimetter QR Qylmystyq-protsestik kodeksiniń 201-babyna sáıkes jarııa etilýge jatpaıdy. Sonymen qatar jalǵan aqparat taratqany úshin QR Qylmystyq kodeksiniń 274-babyna sáıkes qylmystyq jaýapkershilik kózdelgeni eskertiledi. QR Konstıtýtsııasynyń 77-babynyń 3-tarmaǵy 1-tarmaqshasyna jáne Qylmystyq-protsestik kodeksiniń 19-babynyń 1-bólimine sáıkes árkim óziniń qylmystyq quqyq buzýshylyq jasaýdaǵy kináliligi dáleldengenge jáne sottyń zańdy kúshine engen úkimimen belgilengenge deıin kinásiz bolyp sanalady», - delingen resmı aqparatta.

Eske sala keteıik, budan buryn Batys Qazaqstanda esepshiniń 7 mln teńge bıýdjet qarajatyn qumar oıynǵa salyp jibergenin jazǵan bolatynbyz.