Oralda ınternet-dúken kýreri esirtkimen ustaldy

ORAL. KAZINFORM – «Tsıfrlyq satý» jedel aldyn alý is-sharasy aıasynda BQO polıtsııa departamenti esirtki qylmysyna qarsy is-qımyl basqarmasynyń qyzmetkerleri Oral qalasynyń 26 jastaǵy turǵynyn qolǵa túsirdi.

BQO polıtsııa departamentiniń baspasóz qyzmeti málim etkenindeı, kúdiktiniń turǵylyqty jerinen ózindik ıisi bar aq tústi untaq zat salynǵan bir túıinshek, 9 áınek qurylǵy, elektrondyq tarazylar, zıp-paketter tabylyp, tárkilendi.

Budan bólek, ishinen oqshaýlaǵysh lentamen oralǵan jáne aq tústi untaq zat salynǵan 35 túıinshek tárkilendi. 

— Sondaı-aq kúdikti polıtsııa qyzmetkerlerine esirtki jasyrǵan oryndardy kórsetken, sol jerlerden taǵy 10 túıinshek tabylyp, tárkilendi. Aldyn ala derekterge sáıkes, kúdikti úsh aı boıy esirtki taratýǵa qatysy bar ınternet-dúkende kýrer bolyp jumys istegen. Atalǵan fakti boıynsha qylmystyq is qozǵalyp, tergeý amaldary júrgizilip jatyr, — dep habarlady vedomstvodan.

Eske sala keteıik, budan buryn Oralda esirtki saýdasymen aınalysqan eki stýdent qyzdyń ustalǵanyn jazǵanbyz.

Sondaı-aq Oralda kolledjdiń eki stýdenti tóbelesip, aýrýhanaǵa tústi.