Oralda ımporttyq jumyrtqany zańsyz satý derekteri anyqtaldy
ORAL. KAZINFORM – Oral qalasynda tyıym salynǵan ónimdi satqan kásipkerlik nysanyna ákimshilik shara qoldanyldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, Aýyl sharýashylyǵy mınıstriniń 2026 jylǵy 17 sáýirdegi № 146 buıryǵymen QR aýmaǵyna taýyq jumyrtqasyn ákelýge tyıym salyndy.
Shekteý 2026 jylǵy 21 sáýirden bastap alty aı merzimge engizildi jáne ol Eýrazııalyq ekonomıkalyq odaǵy syrtqy ekonomıkalyq qyzmeti taýar nomenklatýrasynyń (EAEO SEQ TN) 040721 kody bar ónimderge qoldanylady.
Departament basshysynyń sózine qaraǵanda, tyıym kóliktiń barlyq túrlerimen jetkiziletin ónimderge qatysty. Bul shara ishki naryqty turaqtandyrýǵa jáne otandyq óndirýshilerdi qoldaýǵa baǵyttalǵan.
- Osyǵan baılanysty departament oblystyq kásipkerlik jáne ındýstrıaldyq-ınnovatsııalyq damý basqarmasymen, QR AShM Veterınarııalyq baqylaý jáne qadaǵalaý komıteti Oral qalalyq aýmaqtyq ınspektsııasymen, sondaı-aq Qazaqstan qus ósirýshiler odaǵynyń ókilderimen birlesip 8 maýsym kúni «Altyn alma» bazarynyń aýmaǵynda reıd júrgizdi. Reıd barysynda bazardaǵy saýda núkteleriniń birinde ımporttyq (Mordovııa Respýblıkasy) jumyrtqalardyń satylý deregi anyqtaldy, - deıdi E.Qımatova.
Onyń aıtýynsha, satý deregi tirkelip, sony aıǵaqtaıtyn foto jáne vıdeojazba jasaldy.
Departament bul aqparatty tıisti sharalar qoldaný úshin Veterınarııalyq baqylaý jáne qadaǵalaý komıtetiniń BQO boıynsha aýmaqtyq ınspektsııasyna joldady.
Aýmaqtyq ınspektsııa bergen aqparatqa sáıkes tyıym salynǵan ónimdi satqan kásipkerlik sýbektisine qatysty ákimshilik is qozǵalyp, 50 AEK kóleminde aıyppul salyndy. 1 050 dana kólemindegi ónimdi ýákiletti organ komıssııalyq túrde joıý úshin tárkiledi.
- Reıdtik is-sharalardy júrgizýdiń nátıjesinde 11 maýsymda qaladaǵy sýpermarketterdiń taǵy bireýinde ákelýge tyıym salynǵan jumyrtqalardyń jergilikti qus fabrıkasynyń ónimi túrinde satylyp jatqany belgili boldy. Bul derek te tirkeldi, saýda nysanynyń basshylyǵyna qatysty sharalar qoldanylatyn bolady, - dep qosty E.Qımatova.
Eske sala keteıik, budan buryn BQO-da sıyr etiniń baǵasyn asyryp satqan kásipkerdiń jaýapqa tartylǵanyn jazǵan edik.
