Oralda ıis tıgen 15 oqýshy aýrýhanaǵa jetkizildi
ORAL. QazAqparat - Búgin №40 mekteptegi oqys oqıǵadan keıin 15 oqýshy men 1 muǵalimniń aýrýhanaǵa jetkizilgeni belgili boldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmetinen alynǵan málimetke qaraǵanda, saǵat 11.24-te atalmysh mektepten úsh oqýshynyń ózin jaısyz sezingeni týraly habar túsken.
Saǵat 11.30-da jedel járdemniń alǵashqy brıgadasy oqıǵa ornyna jetken. Keıin oǵan qosa 4 brıgada shyǵyp, oblystyq kópbeıindi balalar aýrýhanasyna taǵy 12 oqýshyny jetkizgen. Bir muǵalim qalalyq kópbeıindi aýrýhanaǵa túsken.
Baspasóz hatshysy Aınagúl Saqposynovanyń sózine qaraǵanda, zardap shekkenderdiń barlyǵyna belgisiz hımııalyq zattan jeńil dárejede ýlanǵan degen dıagnoz qoıylǵan. Olardyń tynyshtyǵy men kóp suıyqtyq ishýi qamtamasyz etildi. Barlyq 15 oqýshy birneshe saǵat boıy dárigerler baqylaýynda boldy. Sodan keıin olardyń jaǵdaıy qanaǵattanarlyq kúıge jetip, densaýlyǵyna qaýip tónbegen soń, úılerine qaıtaryla bastady.
Jeńil dárejede ýlanýǵa qosa bul jaǵdaı janyna jaısyz tıgen muǵalimdi ýaqytsha aýrýhanaǵa jatqyzý týraly sheshim qabyldandy.
BQO ishki ister departamenti baspasóz qyzmetiniń málimeti boıynsha oqýshylardyń ýlanǵany jóninde shamamen saǵat 11.53-te habar túsken. Sol boıda oqıǵa ornyna jedel tergeý toby jiberilgen.
Qazirgi kezde oqıǵanyń mán-jaıy anyqtalý ústinde.
Eske sala keteıik, budan buryn atalmysh mektepte gazdyń ıisinen birneshe oqýshynyń jedel járdem qyzmetine júgingenin jazǵan bolatynbyz.
