Oralda Hyundai men jedel járdem kóligi soqtyǵysty, 5 adam jaraqat aldy
ORAL. QazAqparat – Oral qalasynda Hyundai men jedel járdem kóligi soqtyǵysty, 5 adam túrli jaraqat aldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmeti málim etkenindeı, oqıǵa 14 tamyz kúni tańerteń Saraıshyq pen Á.Áıtıev kósheleriniń qıylysynda boldy.
Báıterek aýdany Kóshim aýyldyq aýrýhanasynyń sanıtarlyq kóligi jeńil kólikke soǵylǵan. Jol apatynda 5 adam zardap shegip, olarǵa 4 jedel járdem brıgadasy medıtsınalyq kómek kórsetti.
Qazirgi málimet boıynsha 4 adam jabyq bas-mı jaraqatyn alǵan. Oǵan qosa dene músheleri synǵan. Jaraqat alǵandardyń arasynda medıtsına qyzmetkerleri de bar. Júrgizýshi men feldsher, sondaı-aq aýrýhanaǵa apara jatqan 1957 jylǵy er adam synyq jaraqatyn alǵan.
Zardap shekkenderdiń barlyǵy oblystyq kópbeıindi aýrýhananyń hırýrgııa bólimine jatqyzyldy.
BQO polıtsııa departamenti baspasóz qyzmetiniń naqtylaýynsha, oqıǵa tańǵy saǵat 07.00 shamasynda oryn aldy. Hyundai men jedel járdem kóligi soǵylǵan. Negizi jedel járdem kóligi qatty kele jatqan. Qazirgi kezde oqıǵanyń jaı-japsary anyqtalyp jatyr.
Eske sala keteıik, Oralda keshe qatty jelden aǵashtar qulap, kólikterdi basyp qaldy.
