Oralda halyqaralyq Olımpıada kúni keńinen atalyp ótildi (FOTO)
ORAL. QazAqparat - Búgin Oral qalasynda halyqaralyq olımpıada kúnine oraı velojoryq jáne basqa sporttyq sharalar uıymdastyryldy.
Velosıpedshiler shahardaǵy tennıs kesheninen P.Atoıan atyndaǵy stadıonǵa deıingi aralyqty (toǵyz shaqyrym) qatar túzep, júrip ótti.
Sharaǵa qatysqan oblys ákimi Nurlan Noǵaevtyń atap ótkenindeı, ıgi dástúrge aınalǵan velojoryqqa qatysýshylar sany jyl sanap kóbeıip keledi. Olardyń ishinde kásibı sportshylarmen qatar jas ta, kári de bar. Qalyń buqarany sportqa tartyp, salaýatty ómir saltyn ornyqtyrýda mundaı sharalardyń mańyzy zor. Onyń ústine Astana, Almaty, Shymkent jáne Oral qalalarynda birdeı ýaqytta ótkizilgen velosherý Qazaqstannyń 2022 jylǵy qysqy Olımpıada oıyndaryn ótkizý jónindegi ótinimin qoldaýǵa arnaldy.
Almaty halyqaralyq sport jobalary dırektsııasynyń ókili Qaırat Seıtekovtiń aıtýynsha, Olımpıada kúni alǵashqy ret 1948 jyly merekelengen. Qazaqstanda jıyrma eki jyl boıy toılanyp keledi. Qazirgi kezde bul meıram álemniń 200-den astam elinde atalyp ótiledi. Aıta ketý kerek, 2022 jylǵy HHІV qysqy olımpıada jáne HІІІ paralımpıadalyq oıyndardy ótkizýge qazirgi kezde úmitker retinde Almaty men Beıjiń ǵana qaldy. Atalmysh dúnıejúzilik doda ótetin jer halyqaralyq olımpıada komıtetiniń Kýala-Lýmpýr qalasynda 31 shilde kúngi sessııasynda anyqtalady.
Velojoryq qorytyndysy boıynsha alty jasar Roman Rıter «eń jas qatysýshy», 75 jastaǵy Oleg Popov «eń jasy úlken qatysýshy», «Jaıyqjylýqýat» AQ qyzmetkeri Aınur Bergembaeva «eń názik jandy qatysýshy», tanymal kásipker, oblystyq máslıhattyń depýtaty Aqserik Áıtimov «eń kreatıvti qatysýshy» atanyp, arnaıy júldelermen marapattaldy.
Oblystyq dene shynyqtyrý jáne sport basqarmasynyń basshysy Azamat Bekettiń sózine qaraǵanda, velojoryqqa myńǵa jýyq adam qatysty.
P.Atoıan atyndaǵy stadıondaǵy saltanatty shara strıtbol, golf, ústel tennısi, arqan tartý, gir tasyn kóterý, armrestlıng jáne basqa sport túrlerinen ótken jarystarǵa ulasty.
