Oralda Hadısha Bókeevanyń 100 jyldyǵyna arnalǵan teatrlar festıvali márege jetti
ORAL. QazAqparat - Batys Qazaqstan oblystyq qazaq drama teatrynda ataqty aktrısa, KSRO jáne Qazaqstannyń halyq ártisi, Memlekettik syılyqtyń laýreaty Hadısha Bókeevanyń 100 jyldyǵyna arnalǵan oblystyq halyqtyq teatrlar festıvali márege jetti, dep habarlaıdy «QazAqparat» tilshisi.
BQO mádenıet, arhıvter jáne qujattama basqarmasynyń qoldaýymen oblystyq halyq shyǵarmashylyǵy ortalyǵy uıymdastyrǵan úsh jylda bir ret ótetin dástúrli óner dodasyna barlyǵy 11 teatr qatysyp, baq synady. Olardyń toǵyzy halyqtyq teatr bolsa, ekeýi - drama úıirmesi.
Baıqaý qorytyndysynda Terekti aýdandyq «Dat» teatry bas júldeni jeńip aldy. Budan eki jylǵa jýyq ýaqyt buryn Terekti aýdandyq mádenı-demalys ortalyǵynyń janynan qurylǵan «Dat» teatry osetın dramatýrgy Georgıı Hýgaevtyń shyǵarmasy boıynsha «Qara shekpen» áfsanasyn (rejısseri Jambyl Zaev) sahnalady. Osylaısha, halyqtyq ataǵy bolmasa da, tájirıbeli teatrlardan ozyp shyqty.
Qaztalov aýdandyq S.Sadyqov atyndaǵy halyqtyq teatry belgili jazýshy-dramatýrg Rahymjan Otarbaevtyń «Beıbarys Sultan» tarıhı dramasymen (rejısseri Danagúl Jumabaeva) birinshi orynǵa ıe boldy. Qaztalov aýdany Jalpaqtal aýyldyq M.Ǵumarov atyndaǵy halyqtyq teatry Reı Kýnıdiń «Tesik tıyn» komedııasyn (rejısseri Shalqyma Merkýlova) jáne Tasqala aýdandyq halyqtyq teatry Nurlan Hamıdiń «Han Kene» tarıhı dramasyn (rejısseri Janar Bısenǵalıeva) qoıyp, ekinshi orynǵa kóterildi. Sondaı-aq Jánibek, Qaratóbe aýdandyq halyqtyq teatrlary men Bórli aýdandyq «Murager» teatry úshinshi júldeni bólisti.
Erekshe kózge túsken qatysýshylar arnaıy atalymdarmen marapattaldy. Atap aıtqanda, terektilik Gúlmıra Tólegenova «Kórermender kózaıymy», «Murager» teatry «Úzdik dekoratsııa», jalpaqtaldyq Sh.Merkýlova «Úzdik rejısser», syrymdyq Aıgúl Mámbetqulova «Eń jas aktrısa», qaztalovtyq Merlan Nurolla «Eń jas akter», jalpaqtaldyq Anar Mýsına «Eń úzdik áıel adam róli», terektilik Tańat Jeksenbaev «Eń úzdik er adam róli» atalymdaryna ıe boldy.
