Oralda Hadısha Bókeeva atyndaǵy qazaq teatry 25 jyldyǵyn atap ótti
ORAL. QazAqparat - Oralda H.Bókeeva atyndaǵy oblystyq qazaq drama teatrynyń 25 jyldyǵy atalyp ótti, dep habarlaıdy QazAqparat tilshisi.
Mereıtoı teatr akteri ári bas rejısseri Samal Ábýovtyń «Teatr. Tarıh. Taǵylym» atty kitabynyń tusaýkeserimen ashyldy.
Tusaýkeser rásimin kezinde osy teatrdyń ashylýynyń basy-qasynda bolǵan belgili óner sheberleri, Qazaqstannyń eńbek sińirgen ártisi, jýyrda ekranǵa shyqqan «Elbasy joly. Astana» fılminde memleket basshysynyń rólin somdaǵan Murat Ahmanov pen Qazaqstannyń halyq ártisi Gúlnár Jaqypova ashyp berdi.
Atalmysh jınaqta teatrdyń shırek ǵasyrlyq tarıhy, onyń alǵashqy dırektory, Qazaqstannyń eńbek sińirgen ártisi Amantaı Sultanǵalıev, elimizdegi úsh teatrdyń negizin qalaǵan rejısser Jambylbek Esenbekov, KSRO halyq ártisi Hadısha Bókeevanyń shákirtteriniń biri, daryndy akter Telman Imashev, pantomımo óneriniń has sheberi Zefıl Sıtdıkov, Syrym batyrdy somdaǵan Temirbolat Esenǵalıev, Qazaqstannyń eńbek sińirgen ártisi, Memlekettik syılyqtyń laýreaty Serdesh Qajymuratov syndy biregeı tulǵalar jóninde syr shertiledi.
Jalpy, Oraldaǵy qazaq drama teatrynyń tarıhy budan da áride jatyr. Onyń negizin ótken ǵasyrdyń otyzynshy jyldary qazaqtyń tuńǵysh kásibı rejısseri Jumat Shanın qalady. Alaıda Jumat Shanın «halyq jaýy» atanyp, atylyp ketse, basqa da ártisteri otyzynshy jyldardyń qýǵyn-súrginine ushyrady. Aqyry 1948 jyly Oraldaǵy qazaq mýzykalyq drama teatry «kórermeni az, qarajat jetispeıdi» degen syltaýmen jabylyp, Atyraý qalasyna kóshirildi.
1989 jyly Batys Qazaqstan oblystyq «Oral óńiri» gazetinde «Oralǵa qazaq teatry qajet» degen ózekti másele kóterilip, ony halyq jappaı qoldady. Osyndaı jumystar nátıjesinde Oraldaǵy qazaq drama teatry 1993 jyly 16 jeltoqsanda Muhtar Áýezovtiń «Qaragóz» tragedııasymen ashyldy.
«Árıne, teatr tarıhyna baılanysty derekter az emes. Ol úshin arhıvterdi qoparýǵa týra keledi. Elbasymyzdyń «Uly dalanyń jeti qyry» atty maqalasynda aıtylǵanyndaı, ulyqtaýǵa turarlyq tulǵalar bizdiń teatrda da az emes. Osy maqsatta teatr mýzeıi ashyldy. Aldaǵy ýaqytta zertteý jumystaryn jalǵastyryp, mýzeı qoryn tolyqtyra beretin bolamyz», dedi atalmysh kitap avtory Samal Ábýov.
1993 jyly teatr qaıtadan ashylǵan kezde elimizdiń túkpir-túkpirinen rejısserler men akterler jumysqa keldi. Oǵan Oraldyń ózindegi jas talanttar qosyldy.
Teatrdyń shırek ǵasyrlyq toıyna qazaqtyń «Qyz Jibegi» atanǵan Qazaqstannyń eńbek sińirgen ártisi Merýert Ótekesheva, T.Júrgenov atyndaǵy Qazaq ulttyq óner akademııasynyń rektory Ashat Maemırov, Q.Qýanyshbaev atyndaǵy memlekettik akademııalyq qazaq mýzykalyq drama teatrynyń dırektory Aıbolat Seksenbaev, Oral teatrynda jary Murat Ahmanovpen birge eńbek etken Qazaqstannyń eńbek sińirgen qaıratkeri, Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń ártisi Hazıma Nuǵmanova jáne basqa óner qaıratkerleri arnaıy qatysty.
Foto: Rafhat Halelov
