Oralda granataǵa uqsas zat tabyldy

ORAL. QazAqparat – Oralda granataǵa uqsas zat tabyldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen túsken málimetke qaraǵanda, oqıǵa búgin shamamen saǵat 10.55-te oryn aldy.

«Jaıyq Taza Qala» JShS qyzmetkeri Á.Áıtıev pen L.Tolstoı kósheleriniń qıylysynda aýmaqty tazalaý kezinde qoqys konteıneriniń qasynan granataǵa uqsas zat taýyp alǵanyn habarlaǵan.

Aqparat túsken boıda oqıǵa ornyna oblystyq polıtsııa departamenti men Oral qalasy polıtsııa basqarmasynyń basshylyǵy, jedel tergeý toby, saperler jáne basqa múddeli qyzmetter dereý jetti.

Barlyq qaýipsizdik sharalary saqtala otyryp, tabylǵan zat qaýipsiz jerge shyǵaryldy. Ony jarý jáne tehnıkalyq saraptama jasaý máselesi sheshilýde.

Saperler atalǵan aýmaqty qarap shyqty, basqa kúdikti zat tabylǵan joq.

foto: mgorod.kz