Oralda ǵımaratqa bomba qoıyldy dep qońyraý shalǵan áıel ustaldy
ORAL. QazAqparat - Oralda ǵımaratqa bomba qoıyldy dep qońyraý shalǵan áıel ustaldy, dep habarlaıdy QazAqparat tilshisi.
Oral qalalyq ishki ister basqarmasy bastyǵynyń birinshi orynbasary Nurlan Bısenovtiń aıtýynsha, keshe saǵat 20.30 shamasynda áıel adam ómirlik qıyn jaǵdaıda qalǵan adamdardy qaıta áleýmettendirýge arnalǵan ortalyqqa bomba qoıyldy dep qońyraý shalǵan.
Sol boıda ǵımarat qorshaýǵa alynyp, barlyq tıisti is-sharalar atqaryldy. Eshqandaı jarylǵysh zat tabylǵan joq, qońyraý jalǵan bolyp shyqty.
«Jalǵan qońyraý shalǵan 1985 jylǵy áıel adam ustaldy, qazirgi kezde QR QK 273-babyna sáıkes qylmystyq is qozǵalyp, tergeý amaldary júrgizilýde», dedi QazAqparat tilshisine N.Bısenov.
Aıta keteıik, atalǵan bap (terrorızm aktisi týraly kórineý jalǵan habarlaý) boıynsha qylmysqa barǵan adam bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge ne sol merzimge bas bostandyǵynan aıyrýǵa jazalanady.
