Oralda gıdravlıkalyq synaq barysynda jylý qubyry jaryldy
ORAL. KAZINFORM — Oral qalasynda jylytý maýsymyna daıyndyq barysynda gıdravlıkalyq synaqtar júrgizilip jatyr.
«Jaıyqjylýqýat» AQ-dan málim etkenindeı, synaq kezinde 28 tamyzda M.Júnisov kóshesi boıyndaǵy № 7 magıstraldyq qubyr jelisinde apat boldy.
— Dıametri 530 mm qubyr jarylyp, jylý jelisi zaqymdandy. Qazirgi ýaqytta apatty joıý jáne jylý júıesin qalpyna keltirý maqsatynda qubyrdy aýystyrý jumystary júrgizilip jatyr, — dep habarlady vedomstvodan.
«Jaıyqjylýqýat» AQ osyǵan deıin 25-29 tamyz aralyǵynda gıdravlıkalyq synaqtar júrgizilýine baılanysty ystyq sý berý ýaqytsha toqtatylatynyn áleýmettik jelidegi paraqshasynda jazǵan bolatyn.
Eske sala keteıik, budan buryn Batys Qazaqstanda qandaı jylý nysandary jańartylyp jatqanyn jazǵan edik.
Sondaı-aq Oralda qubyrdaǵy apatqa baılanysty qalanyń eki bóliginde salqyn sý berý toqtatyldy.