Oralda gaz jarylyp, úsh adam aýrýhanaǵa tústi
ORAL. QazAqparat – Oralda salynyp jatqan úıde órt shyǵyp, úsh adam zardap shekti, dep habarlaıdy QazAqparat tilshisi.
BQO Tótenshe jaǵdaılar departamenti Azamattyq qorǵaý salasynda apat qaýpin tómendetý jáne baqylaý basqarmasynyń bastyǵy Erlan Tóregeldıevtiń aıtýynsha, oqıǵa 30 qańtar kúni saǵat 17.02-de «Bolashaq» shaǵynaýdany M.Bekimov kóshesi, 53-úıde boldy.
Anyqtalǵandaı, gaz ballonynyń «Parma TPG-30» jylý-gaz qurylǵysy (pýshka) qyzyp ketken. Sonyń saldarynan gaz ballony ajyrap ketip, gaz-aýa qospasynyń jarylýynan órt shyqqan. Úıdiń qabyrǵasy qırap, janǵan, tóbesin de ot sharpyǵan.
Aýmaǵy 80 sharshy metrdi qamtyǵan órt saǵat 18.39-da sóndirildi. Oǵan 15 adam, 6 tehnıka jumyldyryldy.
Órt gaz jabdyǵyn paıdalaný kezinde qaýipsizdik talaptaryn saqtamaýdan shyqqan.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, oqıǵa saldarynan úsh adam kúıik jaraqatyn aldy. 21 jastaǵy jigittiń betin, keýde tusyn jáne aıaq-qolyn, 21 jastaǵy taǵy biriniń bóksesin kúıik shalǵan. Al 18 jastaǵy er balanyń jelke tusy kúıgen. Úsheýi de oblystyq kópbeıindi aýrýhanaǵa jetkizildi.
