Oralda ǵasyrdan astam tarıhy bar gazetterge arnalǵan kórme ashyldy
ORAL. QazAqparat - BQO tarıhı-ólketaný mýzeıinde oblystyq «Oral óńiri» jáne «Prıýrale» gazetteriniń 101 jyldyǵyna oraı kórme ashyldy, dep habarlaıdy QazAqparat tilshisi.
«Ǵasyr jasaǵan qos basylym» atty kórmege oblystyq gazetterdiń tarıhyna qatysty qundy jádigerler men jýrnalısterdiń tutynǵan buıymdary qoıylǵan.
Kórmeniń ashylý rásiminde qos oblystyq, on eki aýdandyq gazettiń basyn biriktirip otyrǵan «Jaıyq Press» JShS bas dırektory Raýan Sábıtov óńirdegi baspasóz tarıhynyń tereńde jatqanyn jetkizdi.
Qazaq halqynyń bolashaǵyn oılaǵan Sháńgereı Bókeev, Baqytjan Qarataev, Eleýsin Buırın, Ǵumar Qarash syndy ult zııalylary 1911 jyly Bókeı handyǵyndaǵy Ordada «Qazaqstan» gazetin shyǵarǵany málim. Keıin osy basylymnyń jalǵasy retinde Ǵabdolǵazız Musaǵalıevtiń redaktorlyǵymen 1917 jylǵy 28 shildeden Ordada (qazir Bókeı ordasy aýdany Han ordasy aýyly) «Uran» gazeti shyǵa bastady. Mine, oblystyq gazetter bastaýyn osy «Urannan» alady.
Sodan beri ǵasyrdan astam ýaqyt boıy patsha kóńildi oqyrmandarynyń «kózi men qulaǵyna» aınalyp, seniminen shyǵyp kele jatqan oblystyq «Oral óńiri» men «Prıýrale» gazetteri qazirgi tańda da aqparat salasynda óz maqsat-mindetterinen aınyǵan emes.
«Oral óńiri» gazetinde 1972-2002 jyldary qyzmet atqaryp, 11 jyl boıy bas redaktor bolǵan Májıt Qaıyrǵalıev qazirgideı rýhanı jańǵyrý kezeńinde mundaı kórmeniń, ásirese, jas urpaq úshin mańyzy zor ekendigin atap kórsetti.
«Kórmemen tanysqan adamdar qos gazettiń tarıhyna qanyǵa alady. Munda basylymnyń shyǵý tarıhynan bastap tigindileri, onda qyzmet atqarǵan jýrnalısterdiń ómirderekteri, qoldanǵan quraldary jınaqtalǵan. Bul da - bizdiń tarıhymyz», dedi Qazaqstannyń qurmetti jýrnalısi M.Qaıyrǵalıev.
Oblystyq tarıhı-ólketaný mýzeıi dırektorynyń orynbasary Ajar Berikqalıqyzy ólkedegi baspasóz tarıhyna qatysty jádigerlerdi batysqazaqstandyq turǵyndardyń bir aı boıy tamashalaı alatynyn málim etti.
