Oralda ǵaryshtyq tehnologııany damytýǵa arnalǵan forým ótkizildi
QR Bilim jáne ǵylym mınıstrligi, BQO ákimdigi, «Nur Otan» partııasy oblystyq fılıaly, QR Ulttyq ınjenerlik akademııasy jáne «KazIITÝ» ǵylym-bilim kesheni birlesip uıymdastyrǵan, Qazaqstan, Reseı, AQSh-tan kelgen ǵalymdar qatysqan jıynda oblys ákiminiń orynbasary Igor Steksovtiń atap ótkenindeı, Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynda ınnovatsııa men kólik tehnologııalaryn damytýǵa aıryqsha kóńil bólingeni belgili. 
Qazirgi tańda Qazaqstanda 2020 jylǵa deıingi ınnovatsııalyq damý tujyrymdamasy qabyldanyp, júzege asyrylýda. 2015-2019 jyldarǵa arnalǵan ındýstrııalyq-ınnovatsııalyq damý memlekettik baǵdarlamasyna ózgerister engizildi. Atalmysh salada «Tehnologııalyq damytý boıynsha ulttyq agenttik» AQ arqyly qoldaý kórsetilýde, «Bıznestiń jol kartasy - 2020» baǵdarlamasyna sáıkes ınnovatsııalyq granttar berilýde. 2012 jyldan beri óz isin bastaǵan 60 kásipker 130 mln. teńge kóleminde memlekettik ınvestıtsııalyq grantqa ıe boldy. Bıyl bul maqsatqa 47 mln. teńge bólinip otyr. Oblysta ǵylymı-tehnıkalyq, qamqorshylyq keńester jumys jasaýda. Sondyqtan jańashyl jandarǵa qoldaý kórsetile beretin bolady.
Forýmda Qazaqstan ónerkásibi salasynda qýat únemdeý tehnologııasyn qoldaný, «Tsıfrly Qazaqstan» jobasy aıasynda qazirgi zamanǵy úlgilerdi paıdalaný máseleleri sóz boldy. Sondaı-aq keńestik dáýir kezinde Batys Qazaqstan oblysynyń keı jerinde raketalyq-ǵaryshtyq qyzmettiń atqarylyp, túrli qarýlardyń synalǵany da aıtylmaı qalǵan joq. Munyń zardaptaryn óńir turǵyndary áli kúnge deıin tartyp keledi. Sonymen qatar ǵaryshty ıgerýge qatysqan qazaqstandyq maman-ǵalymdardyń umyt qalmaýy da mańyzdy.
Forým barysynda robot tehnıkasy men ınnovatsııalyq tehnologııa kórmesi uıymdastyrylyp, ǵalymdar pikir almasty. Qazaqstan halqy BQO assambleıasy men «KazIITÝ» ǵylym-bilim kesheni arasynda yntymaqtastyq jónindegi memorandýmǵa qol qoıyldy.
