Oralda garaj ben úsh avtokólik órtenip ketti

ORAL. QazAqparat – Oral qalasynda garaj ben úsh avtokólik túgeldeı órtenip ketti. BQO TJD baspasóz qyzmetinen málim etkenindeı, oqıǵa 29 mamyr kúni saǵat 20:20-da Moldavskaıa kóshesinde ornalasqan jeke úıdiń aýlasynda boldy, dep habarlaıdy QazAqparat tilshisi.

Tehnıkalyq qyzmet kórsetý stansasy esebinde qaıta jabdyqtalǵan garaj ben onda turǵan úsh avtokólik otqa orandy.

Órt aýmaǵy - 180 sharshy metr. Oqıǵa ornynan 50 lıtrlik úsh ottegi ballony shyǵaryldy.

Tilsiz jaý 21:19-da oqshaýlanyp, 21:59-da aýyzdyqtaldy. Órt sóndirýshiler (20 adam, 6 tehnıka) jalynnyń turǵyn úıdi sharpýyna jol bergen joq.

Órttiń shyǵý sebebi, keltirilgen shyǵyn, kináli adamdar anyqtalý ústinde.

BQO densaýlyq saqtaý basqarmasy baspasóz qyzmetiniń naqtylaýynsha, bir adam qolyn kúıdirip alǵan. Ol aýrýhanaǵa barýdan bas tartty.

Eske sala keteıik, budan buryn Batys Qazaqstanda jasóspirimniń Jaıyq ózenine batyp ketkenin jazǵan bolatynbyz.