Oralda Ǵ.Músirepov atyndaǵy teatrdyń gastroli ótip jatyr
ORAL. QazAqparat - Batys Qazaqstan oblystyq qazaq drama teatrynda Ǵ.Músirepov atyndaǵy qazaq memlekettik akademııalyq balalar men jasóspirimder teatrynyń (dırektory, «Daryn» memlekettik jastar syılyǵynyń ıegeri Sábıt Ábdiqalyqov, kórkemdik jetekshisi Erkin Jýasbek) gastroli ótýde, dep habarlaıdy «QazAqparat» tilshisi.
Almatylyq teatr senbi kúni Aq Jaıyq kórermenderiniń nazaryna Shyńǵys Aıtmatovtyń shyǵarmasy boıynsha qoıylǵan «Qyzyl oramaldy shynarym» atty eki bólimdi dramasyn (rejısseri Talǵat Temenov) usyndy. Al jeksenbi kúni osetın dramatýrgi Georgıı Hýgaevtyń «Qara shekpen» atty áfsanasy (aýdarǵan uzaq jyl BQO teatryna jetekshilik etken Qujyrǵalı Tóleýishev) qoıyldy.
Bul spektakl batysqazaqstandyq kórermenderge jaqsy tanys. Óıtkeni ony oraldyq rejısser, qazir Astana qalasynda turatyn «Bolashaq» baǵdarlamasynyń túlegi Ashat Maemırov alǵash ret Batys Qazaqstan oblystyq qazaq drama teatrynda qoıǵan bolatyn. Sodan keıin A.Maemırov «Qara shekpendi» Ǵ.Músirepov atyndaǵy teatrda sahnalaǵan edi. Bul jumys jemissiz bolǵan joq.
Janýarlardyń beıneleri arqyly adamdardyń shynaıy bet perdesin ashyp kórsetýge arnalǵan spektaklmen Túrkııanyń Konıa qalasynda ótken «Myń tynys - bir daýys» atty túrkitildes teatrlardyń HІ halyqaralyq festıvalinde «Eń úzdik spektakl» júldesin jeńip aldy.
Jer betin mekendeıtin on segiz myń ǵalamnyń ishindegi eń qudirettisi de, eń aqyldysy da, eń ádemisi de -adam... Al biz dál osyndaı «dárejege» rasymen laıyqpyz ba?! Kez kelgenimizdiń boıymyzda bar ózimshil qasıetter basym túsip, jan azyǵynan maqurym qalǵan adamdaı adamdyq qasıetimiz joıylyp, keıde haıýanǵa aınalyp bara jatqanymyzdy ózimiz de baıqamaı jatamyz. Mine, spektakl osy jaıynda syr shertip, adaldyq pen adamdyq máselesin tereńnen qozǵaıdy.
«Qara shekpenmen» qaıta qaýyshqan batysqazaqstandyq kórermender ony jyly qabyldady. Basty keıipker Tuzar ıttiń beınesinde eńbek jolyn Batys Qazaqstan teatrynan bastaǵan halyqaralyq teatrlar festıvaliniń laýreaty Danııar Bazarqulov sahnaǵa shyqsa, Shopandy Jastar odaǵy «Serper» syılyǵynyń ıegeri Beıbit Qamaranov somdady. Kókjaldy Aq Jaıyq óńirinen túlep ushqan Edil Ramazanov beınelese, Kókshýlandy alǵashqy qadamyn BQO teatrynan bastaǵan Aqmaral Daırabaeva shyǵardy. Qosúreıdiń rólinde Qazaqstannyń eńbek sińirgen ártisi Lıdııa Qadenova oınady. Kórermender basqa da talantty ártisterdiń oıynyna rıza boldy.
Balalar men jastar teatry dúısenbi kúni Muqaǵalı Maqataevtyń rýhyna arnalǵan «Men umytylmaımyn» lırıkalyq dramasyn qoımaqshy. Gastrol 19 sáýir kúni márege jetedi.
