Oralda fýtbol oıyny kezinde 59 jastaǵy qyzylordalyq kóz jumdy

ORAL. QazAqparat – Oral qalasynda ardagerler arasyndaǵy fýtbol oıyny kezinde 59 jastaǵy er adam kóz jumdy, dep habarlaıdy QazAqparat tilshisi.

BQO dene shynyqtyrý jáne sport basqarmasynyń bólim basshysy Dáýren Muqanov málim etkenindeı, oqıǵa 17 qyrkúıek kúni túske deıin «Aqjaıyq» fýtbol klýbynyń stadıonynda bolǵan.

«Oralda 50 jastan asqan ardagerler arasynda respýblıkalyq spartakıada aıasynda shaǵyn fýtbol jarysy «Aqjaıyq» stadıonynda ótip jatqan. Qaıǵyly oqıǵa Qyzylorda men Túrkistan oblystary komandalary arasyndaǵy match kezinde boldy. Báseke bastalǵannan bes mınýttan ótkennen keıin alań shetinde dopty qosý kezinde qyzylordalyq oıynshy qulap qalǵan. Sol jerde dárigerler medıtsınalyq kómek kórsetti. Jedel járdem de jetti. Alaıda, 59 jastaǵy er adamdy aman alyp qalý múmkin bolmady. Onyń densaýlyǵyna shaǵymy bolmaǵan jáne dárigerden jarysqa qatysýǵa ruqsat alǵan», - dedi QazAqparat tilshisine D. Muqanov.

BQO densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jedel járdem saǵat 11:54-te shaqyrylǵan. 1963 jylǵy er adam jedel járdem jetkenge deıin qaıtys boldy. Ólim sebebi sot-medıtsınalyq saraptama negizinde anyqtalady.