Oralda Fıksıkter referendýmǵa daýys berýge keldi
ORAL. KAZINFORM — Oral qalasynyń turǵyndary taǵy da erekshelenip, referendýmǵa «Fıksıkter» mýltfılminiń keıipkeri beınesinde keldi.
Balalar men jasóspirimder arasynda tanymal mýltkeıipker № 268 referendým ýchaskesinde «jandanyp» ketkendeı áser qaldyrdy.
— Men búgin referendýmǵa keldim, óıtkeni bizde bir jaqsy sóz bar: eger kishkentaı bólshek durys jumys istese, búkil mehanızm de jaqsy jumys isteıdi.
Bizdiń elimiz de úlken mehanızmge uqsaıdy. Al árbir azamat — sol mehanızmniń mańyzdy bólshegi. Búgin óz daýysymdy berip, bolashaqtyń bir «burandasyn» birge burap jatyrmyz, — deıdi tanymal mýltserıaldyń «tirilip ketken» keıipkeri.
Mundaı performans № 268 referendým ýchaskesine kelgen saılaýshylardy beıjaı qaldyrmady. Búgin munda adamdardyń qarasy onsyz da kóp, al Fıksıkterdiń kelýi qarapaıym ótip bara jatqan turǵyndardyń da nazaryn aýdardy.
Azamattyq ustanymdy osyndaı jarqyn túrde bildirýge keıipkerdi mýltfılmniń basty urany shabyttandyrǵan.
— Fıksıkter árqashan: «jóndeıik, jaqsartaıyq, jańartaıyq» deıdi. Men de jańa, ádil ári damyǵan Qazaqstandy birge qurýǵa óz úlesimdi qosqymyz keledi.
Sondyqtan búgin men tek kostıýmmen ǵana kelgen joqpyn. Men jańa Qazaqstandy birge qurý ıdeıasyna senip keldim, — dep bólisti jumbaq keıiptegi jas.
Mýltkeıipkerdiń kostıýmin kıgen jas jigit óziniń jeke basyn tek ýchaskelik referendým komıssııasynyń múshelerine ǵana ashyp, daýys berýshiler tiziminde belgilený kezinde tanystyrdy.