Oralda festıval aıasynda qusbegilikten Qazaqstan chempıonaty máresine jetti
ORAL. KAZINFORM – Oral qalasynda alǵash ret qysqy sport túrlerinen «Oral Winter Fest – 2026» festıvali joǵary deńgeıde uıymdastyrylyp, oblys tarıhyndaǵy aıtýly sporttyq ótkizildi.
Festıval aıasynda ulttyq, ekstremaldyq jáne dástúrli qysqy sport túrleri keńinen qamtyldy.
Atap aıtqanda, tazy jarysy, jamby atý, shańǵymen jamby atý (Oral óńirinde buryn-sońdy uıymdastyrylmaǵan tyń baǵyt), avtodrıft, erler men áıelder arasyndaǵy shańǵy jarysy, balalarǵa arnalǵan syrǵanaý, konkı tebý, kerlıng, qysqy basketbol jáne ózge de sport túrleri kópshilik nazaryna usynyldy.
Sonymen qatar festıval aıasynda qusbegilikten eresekter arasyndaǵy Qazaqstan Respýblıkasynyń XIX chempıonaty ótkizildi. Elimizdiń barlyq óńirinen kelgen 70-ke jýyq saıypqyran chempıondyq ataq úshin synǵa túsip, ulttyq sporttyń aıbynyn asqaqtatty. Itelgi men búrkiti, qyrany men qarshyǵasyn qomdaǵan saıatshylar Oral tórinde bas qosyp, ata dástúrdiń tamyryn tereńge tartqan tól ónerdi dáriptedi.
Chempıonattyń ashylý saltanatynda Qazaqstan qusbegilik federatsııasynyń vıtse-prezıdenti, osy salaǵa 30 jylǵa jýyq ǵumyryn arnaǵan etnograf Baǵdat Múptekeqyzy, qusbegilikten aǵa jattyqtyrýshy, federatsııanyń atqarýshy dırektory Bazarbek Kúntýǵan, sondaı-aq BQO dene shynyqtyrý jáne sport basqarmasynyń basshysy Baqdáýlet Sábıtov qatysýshylarǵa sáttilik tilep, ulttyq sporttyń órkendeýine tilektestigin bildirdi.
Búrkitshiler arasynda túrkistandyq Baǵdat Keýenov úzdik atansa, shyǵysqazaqstandyq Arhat Hamıtjanov ekinshi, jambyldyq Serikbolsyn Jalǵasuly úshinshi orynǵa ilikti.
Itelgi baptaǵandardan jambyldyq Baǵdáýlet Babajanov, Aqmola oblysynan kelgen Erlan Kenjetaev jáne qaraǵandylyq Temiráli Tópegenov aldyńǵy úshtikten tabyldy.
B.Babajanov qarshyǵa qosýdan da aldyna jan salmady. Odan keıingi eki oryndy jambyldyq S.Jalǵasuly men batysqazaqstandyq Ernarbek Mámet enshiledi.
Jalpy, festıval aıasyndaǵy barlyq sport túrlerinen saıystar qala turǵyndary úshin tegin uıymdastyryldy. Oǵan qosa kontserttik baǵdarlamalar usynylyp, arnaıy fotosessııa aımaqtary jasaqtaldy.
Alǵashqy kúni festıvalge 1 myńǵa jýyq qatysýshy tirkelse, ekinshi kúni bul kórsetkish 4 myńnan asty. Búldirshinderden bastap qarııalarǵa deıin sport alańynda bas qosyp, qysqy dýmannyń shattyǵyn birge bólisti.
Kerlıngten áıelder arasynda Gúljanat Tólegen jeńimpaz atansa, erlerden Arman Keńshelekov eptilik tanytty.
Tazy jarysynan Eldar Begalıev «Kókjalymen» (ıti – «Kókjal») ozdy.
Dástúrli sadaq atýdan Ásemgúl Ǵalymjanova men Rýstam Amanǵalıev mergendik tanytty.
Jamby atýdan Arman Julqalıev birinshi orynǵa ıe boldy.
Sadaq atýdan Isa Ýálıahmet jeńis tórinen kórindi.
Shańǵy jarysynan qyzdardan (1 km) ıAna Gagaına, uldardan (2 km) Nıkıta Berkovskıı, áıelderden (6 km) Ksenııa Kýdrıavtseva, erlerden Svıatoslav Grıtskevıch chempıon boldy.
Eske sala keteıik, budan buryn Oralda bokstan jasóspirimder arasynda Qazaqstan chempıonaty aıaqtalǵanyn jazǵan edik.