Oralda fermadan qashyp ketken buǵy tabyldy
ORAL. KAZINFORM – Oralda «Severnaıa skazka» fermasynan qashyp ketken buǵy tabylyp, keri qaıtaryldy.
Oqıǵa soltústik buǵysy ósiriletin «Severnaıa skazka» fermasynda boldy. Instagram áleýmettik jelisinde jarııalanǵan málimetke qaraǵanda, 7 aqpan kúni keshkisin ferma aýmaǵyna ıt kirip, buǵylardy úrkitken. Sodan soń bireýin qýa bastaǵan. Sosyn Chýk esimdi buǵy qorshaýdan sekirip, ormanǵa qashqan. Buǵyny turǵyndar 8 aqpan kúni saǵat 17.00-de «Vympel» baý-baqsha seriktestigi men shoıyn kópir arasynda kórgen.
- Buǵyny aman-esen jetkizip bergen adamǵa alǵysymyzdy aıtamyz jáne 500 myń teńge kóleminde syıaqy tóleımiz, - dep jazdy «Severnaıa skazka» fermasy óz paraqshasynda.
Ferma 9 aqpan kúni buǵynyń aman-esen tabylǵanyn habarlady.
- Qymbatty dostar! Chýkty izdeýge kómekteskenińiz úshin rızashylyǵymyzdy bildiremiz. Ásirese, «Rybalka ohota otdyh» qaýymdastyǵyna jeke alǵysymyzdy aıtqymyz keledi. Jigitter Chýkty taýyp, sap-saý kúıinde jetkizdi. Qaıta oralýyńmen, Chýk! - dedi ferma ókilderi.
Eske sala keteıik, budan buryn Oralda ortalyq alańnyń birine qaban kirip ketkenin jazǵan edik.