Oralda evreı halqynyń jańa jyly toılandy
Sharaǵa qatysqan «Qoǵamdyq kelisim» KMM dırektory Aleksandr Ájiǵalıevtiń atap ótkenindeı, bıyl táýelsizdiginiń 25 jyldyǵyn toılaǵaly otyrǵan Qazaq eli osynaý jyldar ishinde kóptegen tabystarǵa qol jetkizdi. Elbasymyzdyń bastamasymen qurylǵan Qazaqstan halqy Assambleıasy aıasynda san ult ókilderi óz salt-dástúrlerin, mádenıeti men tilin odan ári damytý ústinde. Assambleıa men oblys ákimdiginiń qoldaýymen qolǵa alynǵan «Etnostar mádenı kúni» jobasyna sáıkes uıymdastyrylyp otyrǵan kezekti shara - sonyń jarqyn kórinisi. Osyndaı sharalar arqyly óńirdegi etnomádenı birlestikter bir-birimen tyǵyz baılanys jasap, ár halyqtyń ulttyq dástúrlerimen keńirek tanysýǵa múmkindik alyp otyr.
Reseı Federatsııasynyń Oral qalasyndaǵy bas konsýly Saıd Zabıtov, armıan jáne «Vaınah» sheshen-ıngýsh etnomádenı birlestikteriniń jetekshileri, oblystyq máslıhat depýtaty Avetık Amırhanıan, Danılbek Saratov evreı ultynyń ókilderin jańa jyldarymen quttyqtap, baq-bereke tiledi.
«Lamed» evreı etnomádenı birlestiginiń tóraıymy Olga Dergachevanyń aıtýynsha, atalmysh ortalyq 1989 jyly qurylǵannan beri jumys jasap, óńirdiń qoǵamdyq-saıası ómirine belsene aralasyp keledi. Qazirgi tańda oblysta 1 500-den astam evreı ultynyń ókilderi turyp jatyr. «Evreı halqynyń jańa jyly tıshreı kúntizbesine sáıkes qyrkúıek-qazan aılarynda toılanady. Ótkendi qorytyndylap, jańa jylǵa nyq senimmen qadam basatyn osy kez eken. Іzgi nıetke negizdelgen qandaı meıramnyń da atalyp ótilýi oryndy. Ultaralyq kelisim men tynyshtyq ornaǵan elimizdiń órkendeýine biz de óz úlesimizdi qosyp, salt-dástúr, mádenıetimizdi baıyta bermekshimiz», dedi ol.
Mereke barysynda jınalǵandar evreı halqynyń ómirinen syr shertetin kórmemen tanysyp, ulttyq taǵamdardan dám tatty.
