Oralda evakýatsııalyq pýnktte jatqan 10 turǵynnan qyzylsha aýrýy anyqtaldy

ORAL. KAZINFORM – Oral qalasynda sý tasqynyna baılanysty ýaqytsha ornalastyrý pýnktinde jatqan 10 turǵynnan qyzylsha aýrýy anyqtaldy.

Oral qalalyq sanıtarııalyq-epıdemıologııalyq baqylaý basqarmasynyń basshysy Gaýhar Dúıseǵalıevanyń Kazinform tilshisine málim etkenindeı, qazirgi ýaqytta olardyń barlyǵy oblystyq juqpaly aýrýlar aýrýhanasynda em alyp jatyr. Sonyń ishinde úsheýi – balalar. 

Gaýhar Muqsınqyzynyń sózine qaraǵanda, tyǵyz baılanysta bolǵan adamdarǵa 21 kúnge medıtsınalyq baqylaý ornatyldy. Ýaqytsha ornalastyrý pýnktinde dezınfektsııalyq tártip (dezınfektsııalyq eritkishpen ylǵaldy jýý, retsırkýlıator qosý, jeldetý) kúsheıtildi.

«Oral qalasynda keshegi málimet boıynsha 9 ýaqytsha ornalastyrý pýnktinde 1 927 adam jatsa, sonyń 806-sy – balalar. Pýnktterdiń bári de jataqhanalarda ornalasqan. Uıymdastyrylǵan mekeme retinde turǵyndarǵa jergilikti atqarýshy organmen 3 mezgil as máziri, býtıldengen sý uıymdastyryldy. Kelisim-shart boıynsha 6 jeke kásipker tamaqtandyrýda. Daıyn taǵam ortalyqtandyrylǵan qoǵamdyq tamaqtaný oryndarynan jetkiziledi. Ýaqytsha ornalastyrý pýnktterinde qalalyq basqarma mamandarymen epıdemıologııalyq ahýal baqylanýda, taǵam, sý tártibi, nysannyń sanıtarlyq talaptary qadaǵalanady. Qosymsha daıyn taǵamdar laboratorııalyq zertteýge alynyp turady»,- deıdi G.Dúıseǵalıeva. 

Basqarma basshysynyń aıtýynsha, qalada qyzylsha boıynsha epıdemıologııalyq jaǵdaı turaqsyz bolyp otyr. Barlyǵy 638 adamnyń qyzylsha dertine shaldyqqany tirkeldi. Qyzylshanyń aldyn alýdyń eń tıimdi ádisi vaktsınatsııa bolǵandyqtan, qosymsha jappaı ımmýndaý aıasynda qyzylshaǵa qarsy 26 604 bala egildi.

«Taǵy bir aıta keter jaıt, eki adamnan menıngokokk ınfektsııasy anyqtalsa, 10 balanyń kókjótelmen aýyrǵany belgili boldy. Ótken jyly bul aýrýlar tirkelmegen edi. Kókjótelmen syrqattanǵandardyń jeteýi – 1 jasqa deıingi, úsheýi – 1-5 jas aralyǵyndaǵy balalar. Olardyń bári ata-analarynyń bas tartýyna baılanysty ekpemen qamtylmaǵan. Aýrýdyń ósý sebebi – ımmýnıtettiń tómendeýi. Qaladaǵy emhanalardyń egý pýnktterinde kókjótelge qarsy vaktsına jetkilikti. Jaǵdaıdy turaqtandyrý maqsatynda epıdemıologııalyq sharalardy júrgizý jalǵasyp jatyr, ınfektsııalyq aýrýlarǵa kúndelikti monıtorıng júrgizilip otyr. Jyl saıyn vaktsınaǵa senimsizdik tanytatyn ata-analardyń kóbeıýi alańdatady. Vaktsına almaǵan jáne ımmýnıteti tómen nemese joq adamda juqpaly aýrýlardy juqtyrý qaýpi joǵary bolyp keledi. Sondyqtan qyzylshaǵa, kókjótelge qarsy ekpesi joq balanyń turǵylyqty mekenjaıy boıynsha emhanaǵa baryp, ekpe alýy qajet ekendigin ata-analardyń esine salamyz», - dedi G.Dúıseǵalıeva.

Eske sala keteıik, budan buryn Batys Qazaqstanda balalar saýyqtyrý lagerleri sanıtarlyq tekserýden ótkizilip jatqanyn jazǵan bolatynbyz.