Aı-kúni jaqyndap, evakýatsııalyq pýnktke qonystanǵan áıelge kómek kórsetildi
ORAL. KAZINFORM — Oral qalasynda evakýatsııalyq pýnktte turyp jatqan Raýshan Tabynova tórtinshi balanyń anasy atandy.
Óziniń aıtýynsha, zaıyby Aıdos Jumaǵalıev ekeýi 2019 jyly mamyr aıynda 1-saıajaı qoǵamdastyǵy aýmaǵynan jazǵy úı satyp alǵan.
Sodan keıin atalmysh úıdi qysta turýǵa bolatyndaı etip qaıta jóndegen. Bıyl saıajaılarǵa sý basý qaýpi tóngennen keıin evakýatsııalanyp, otbasymen M.Ótemisov atyndaǵy Batys Qazaqstan ýnıversıtetiniń jataqhanasyna ornalasqan.
«Sonda balalarymyzben birge turdyq. Onda da medıtsına qyzmetkerleri, evakýatsııalyq pýnkt mamandary jaqsy kómek kórsetti. Keshe qalalyq kópbeıindi aýrýhanada aman-esen jeńildenip, tórtinshi perzentimdi baýyryma basyp otyrǵan jaıym bar. Evakýatsııalyq ortalyqqa túskennen beri ózime tikeleı habarlasyp, óz járdemin berip jatqan «AMANAT» partııasynyń múshesi, oblystyq máslıhattyń depýtaty Azamat Bısenovke de myń alǵys. Azamat aýrýhanadan shyqqannan keıin turý úshin eki aıǵa jaıly páter jaldap berip jatyr. Kishkentaıym ekeýmizdiń jaǵdaıymyz jaqsy. Buıyrsa, búgin sol páterge baramyz», - deıdi Raýshan.
Onyń sózine qaraǵanda, kishkentaı hanshaıymdarynyń esimin Nazym dep qoıǵan. Otaǵasy Aıdostyń turaqty jumys orny joq, tas qalaýshy. Raýshannyń ózi D.Nurpeıisova atyndaǵy mýzyka mektebinde kishi qyzmetker bolyp jumys istegen. Úlken qyzdary Shyryn Oraldaǵy № 19 mektepte 8-synypta, uldary Nurdos № 22 mektepte 6-synypta oqıdy, Nazymnyń apasy Іńkár «Balaýsa» balabaqshasynda tárbıelenedi.
«№19 mektep jaqyn. Al № 22 mekteptiń arnaıy avtobýsy oqýshylardy osy jerden alyp ketedi. Osyndaı qıyn jaǵdaı týyndaǵan kezde qolushyn sozyp jatqan azamattardyń bárine shyn júrekten alǵysymdy aıtamyn. Jasaǵan jaqsylyqtary myń ese bolyp qaıtsyn. Elimizde tek tynyshtyq pen bereke bolsyn dep tileımiz», dedi R.Tabynova.
M.Ótemisov atyndaǵy Batys Qazaqstan ýnıversıtetiniń baspasóz hatshysy Móldir Sadyrǵalıeva evakýatsııalyq pýnktte 300 adam turyp jatqandyǵyn jetkizdi.
«Evakýatsııalyq pýnktte kópbalaly otbasylar, múgedektigi bar adamdar da ornalasqan. Olardyń bárine barynsha jaǵdaı jasalyp jatyr», - dedi M.Sadyrǵalıeva.
Eske sala keteıik, budan buryn BQO dárigerleri Astanaǵa barýy tıis júkti kelinshekti bosandyryp alǵanyn jazǵan bolatynbyz.
