Oralda Eýrazııalyq ıntegratsııa máselelerine arnalǵan halyqaralyq konferentsııa ótýde
ORAL. 26 naýryz. QazAqparat - 26 naýryz kúni Jáńgir han atyndaǵy Batys Qazaqstan agrarlyq-tehnıkalyq ýnıversıtetinde «Eýrazııalyq ınteratsııa: ınnovatsııalyq baǵdarlamalardy júzege asyrýdaǵy ǵylym men bilimniń róli» taqyrybynda halyqaralyq
ǵylymı-praktıkalyq konferentsııa bastaldy.
TMD elderiniń ǵalymdary bas qosqan jıyndy ashqan atalmysh oqý ornynyń rektory Qazybaı Bozymov ótken jyldyń sońynda Astanada elimizdiń JOO-lary álemdik jetekshi ýnıversıtettermen yntymaqtastyq týraly memorandýmǵa qol qoıǵanyn aıtty. Búgingi jıyn sonyń jalǵasy ispettes.
Oblys ákiminiń orynbasary Serik Súleımenniń atap ótkenindeı, elimizde bilim men ǵylym salasynda kóptegen irgeli ister qolǵa alynǵan. «Elbasymyz óz Joldaýynda ǵylym men óndiristiń júıeli baılanysyna basa nazar aýdaryp otyr, - dedi ol. Ǵylymǵa súıengen eldiń ekonomıkasynyń berik bolatynyn álemdik tájirıbe kórsetýde. Soǵan oraı elimizde ındýstrıaldy-ınnovatsııalyq damý baǵdarlamasy qabyldandy. Osy baǵytta ótken jyldyń ózinde oblysymyzda 157 mlrd. teńgeniń 11 jobasy júzege asty».
Batys Qazaqstan aýyl sharýashylyǵy ınstıtýtynyń túlegi, qazir Sankt-Peterbýrg memlekettik veterınarııalyq medıtsına akademııasynyń rektory qyzmetin atqaryp júrgen Anatolıı Stekolnıkovtyń aıtýynsha, akademııa qazaqstandyq on shaqty JOO-men tyǵyz qarym-qatynasta. Elimizdiń segiz jigiti búginde bul oqý ornynyń stýdenti bolyp júrse, on adam aspırantýrada oqýda. Odan bólek jyl saıyn kóptegen qazaqstandyq mal dárigeri kelip, biliktiligin shyńdap ketedi.
Al I.Arabaev atyndaǵy Qyrǵyz memlekettik ýnıversıtetiniń prorektory Emıl Kanımetov eldegi ekonomıkalyq jaǵdaıǵa baılanysty JOO-lardyń materıaldyq-tehnıkalyq bazasy damı almaı turǵanyn jetkizdi. Sol sebepti olar agrotehnıkalyq saladaǵy mamandarynyń biliktiligin jetildirý úshin BQATÝ-ǵa jiberýge múddeli.
Konferentsııa jumysy erteń de jalǵasady.
