Oralda Eýrazııalyq ındýstrııalyq-logıstıkalyq habtyń irgetasy qalandy
ORAL. KAZINFORM — Oral qalasynda «KAZAKH INVEST» UK» AQ qoldaýymen Eýrazııalyq ındýstrııalyq-logıstıkalyq habtyń irgetasyn qalaý rásimi ótti, dep habarlaıdy BQO ákiminiń baspasóz qyzmeti.
Jobanyń bastamashysy — Eurasia Holding Group quramyna kiretin «Jinone Excellence Investment» JShS.
Mańyzdy nysandaǵy qurylystyń bastalýyna oraı ótken saltanatty rásimge oblys ákimi Narıman Tóreǵalıev qatysty. Aımaq basshysy Prezıdenttiń tikeleı tapsyrmasymen aımaqtaǵy basym ekonomıkalyq salalardy damytý úshin ınvestorlarǵa qajetti ınfraqurylym men daıyn zamanaýı ónerkásiptik alańdar jasaqtalyp jatqanyn jetkizdi.
— Batys Qazaqstan oblysy — elimizdiń batys qaqpasy, ınvestıtsııalyq áleýeti jaǵynan tartymdy aımaqtardyń biri. 2023-2025 jyldary negizgi kapıtalǵa shamamen 2,3 trıllıon teńge ınvestıtsııa tartyldy. 2026 jyldyń birinshi toqsanynda ǵana ınvestıtsııa kólemi 22,4%-ǵa ósip, 135 mıllıard teńgeden asty. Bul kórsetkishter aımaq ekonomıkasyna bıznestiń joǵary senimdiligin kórsetedi. Keıingi 3 jylda 4,9 mıllıard dollardan astam tikeleı sheteldik ınvestıtsııa tartyldy. Bul kórsetkish boıynsha óńir respýblıka aımaqtary arasynda jetekshi oryn alady, — dedi Narıman Tóreǵalıev.
QHR-dyń Aqtóbe qalasyndaǵy Bas konsýlynyń orynbasary Chjan Nan mańyzdy joba eki el arasyndaǵy dostyq qatynas pen óndiristik yntymaqtastyqty damytyp, jańa deńgeıge shyǵarýǵa serpin beretinin atap ótti. «KAZAKH INVEST» UK» AQ basqarmasynyń tóraǵasy Sultanǵalı Kenjequlov jobalardy iske asyrýdyń barlyq kezeńinde ınvestorlarǵa keshendi qoldaý kórsetiletinin málimdedi.
Jańa joba Oral qalasynda 20 gektar aýmaqta iske asyrylady. Investıtsııalardyń jalpy kólemi 130 mln AQSh dollaryn quraıdy. Keshen quramyna jylyna 30 000 tonnaǵa deıin ónim shyǵaratyn bolat konstrýktsııalary zaýyty, jylyna 60 000 danaǵa deıin qurylys qalyptaryn óndiretin zaýyt, sondaı-aq jyl saıyn 250 000 býhtaǵa deıin BV tıpti kabel shyǵaratyn zaýyt kiredi. Nysandy 2026 jyldyń sońynda paıdalanýǵa berý josparlanǵan. Jobany iske asyrý nátıjesinde 510 turaqty jumys orny ashylady.
Habtyń negizgi elementi qytaılyq elektrondyq kommertsııa kompanııalaryn, reseılik treıderler men eýropalyq júk jóneltýshilerdi qosa alǵanda, úshinshi taraptardyń júkterin saqtaýǵa jáne óńdeýge arnalǵan ashyq úlgidegi «A» tıpti keden qoımasy bolady. Bul format óńirdegi tıimdi logıstıkany qamtamasyz etip, halyqaralyq saýdanyń damýyna serpin beredi.
Joba Qytaıdy, Ortalyq Azııany, Reseıdi, Shyǵys Eýropa men Eýropalyq odaqty baılanystyratyn eýrazııalyq ónerkásiptik sınergııa dálizi úshin negizgi holdıngtik platformany qalyptastyrýǵa baǵyttalǵan. Halyqaralyq kólik baǵyttarynyń toǵysynda ornalasqan Oral qalasy EAEO elderiniń naryqtaryna tikeleı shyǵatyn zamanaýı ındýstrııalyq-logıstıkalyq ortalyq qalyptastyrý úshin aıtarlyqtaı áleýetke ıe.
