Oralda et ónimderin «jalǵan» sertıfıkattaý deregi anyqtaldy
ASTANA. KAZINFORM – Oralda quramynda eti bar muzdatylǵan jartylaı fabrıkattardy tıisti synaqtan ótkizbeı sertıfıkattaý deregi anyqtaldy, dep habarlaıdy Saýda jáne ıntegratsııa mınıstrligi.
Zań buzýshylyqty komıtettiń Batys Qazaqstan oblysy boıynsha departamenti sanıtarııalyq-epıdemıologııalyq baqylaý organdarymen birlesken jumys barysynda anyqtaǵan.
Tekserýge muzdatylǵan, quramynda eti bar jartylaı fabrıkattardy baqylaý maqsatynda satyp alý nátıjeleri boıynsha kelip túsken materıaldar negiz bolǵan. Ónim Belarýs Respýblıkasynyń sertıfıkattaý organy resimdegen EAEO sáıkestik týraly deklaratsııasymen birge satylǵan.
Sáıkestikti baǵalaý materıaldaryn zerdeleý barysynda deklaratsııa Almaty qalasyndaǵy akkredıttelgen synaq zerthanasy bergen dep kórsetilgen synaq hattamasynyń negizinde qabyldanǵany belgili boldy.
– Qujattyń túpnusqalyǵyn tekserý maqsatynda departament atalǵan zerthanaǵa resmı suraý joldady. Alynǵan jaýapqa sáıkes, bul ónimge synaqtar zerthanada júrgizilmegen, al tıisti synaq hattamasy resimdelmegen jáne berilmegen, – delingen habarlamada.
Osylaısha, sáıkestik týraly deklaratsııa ónimniń is júzinde synaqtan ótkenin jáne onyń Eýrazııalyq ekonomıkalyq odaqtyń tehnıkalyq reglamentteriniń mindetti talaptaryna sáıkes ekenin rastamaıtyn materıal negizinde tirkelgen.
Materıaldardy qaraý qorytyndysy boıynsha sáıkestik týraly deklaratsııanyń Qazaqstan aýmaǵyndaǵy qoldanysyn joıý týraly sheshim qabyldandy. Aqparat ýákiletti organǵa jáne tehnıkalyq retteý salasynda baqylaý men qadaǵalaýdy júzege asyratyn memlekettik organdarǵa joldandy.
Sáıkestikti rastaý jáne baǵalaý rásimderin júrgizý qaǵıdalaryn buzǵany úshin ónim óndirýshi ákimshilik jaýapkershilikke tartyldy.
– Synaq hattamalarynyń túpnusqalyǵyn jáne dáleldemelik materıaldardyń qadaǵalanýyn tekserý «sur» sertıfıkattaýǵa qarsy is-qımyl jasaýdyń jáne qaýipsizdigi rastalmaǵan ónimnen naryqty qorǵaýdyń negizgi quraldarynyń biri. Departament sáıkestikti baǵalaý jónindegi anyq emes qujattardy anyqtaý jáne qajetti synaqtardy naqty ótkizbeı deklaratsııalardy tirkeý praktıkasynyń jolyn kesý boıynsha vedomstvoaralyq jumysty jalǵastyrady, – dep málimdedi vedomstvo.
Aıta keteıik, Almatyda jalǵan memlekettik tirkeý nómirlerin satqan kúdikti qolǵa túsken bolatyn.
