Oralda esirtki zattaryn zańsyz ótkizýmen aınalysqan eki turǵyn 7 jylǵa sottaldy

ORAL. KAZINFORM — Oral qalalyq sotynda asa iri mólsherde mefedron psıhotroptyq zatynyń analogtaryn zańsyz ótkizgen M. jáne onyń tanysy D-ǵa qatysty qylmystyq is qaraldy. 

BQO sotynyń baspasóz qyzmetiniń málimetinshe, M. zańsyz tabys tabý maqsatynda psıhotroptyq zattardyń analogtaryn jasyryn qoımalarǵa ornalastyryp, olardyń koordınattaryn belgilep otyrǵan. 

Satyp alýshylardy tabý úshin ol tanysy D-ny tartyp, Telegram messendjeri arqyly satý isine kómektesýdi usynǵan. D. óziniń áreketteriniń zańǵa qaıshylyǵyn túsine otyryp, kelisim bergen jáne satyp alýshylarǵa qoımalardyń ornalasqan jeri týraly málimetterdi jetkizip otyrǵan. 

Jedel is-sharalar barysynda D. jasyryn qyzmetkermen baılanys ornatyp, oǵan mefedron psıhotroptyq zatynyń analogy salynǵan 5 zıp-paket jasyrylǵan qoımanyń koordınattaryn joldaǵan. Atalǵan zat tárkilenip, saraptamaǵa jiberilgen.

Budan bólek, M-nyń turǵylyqty jerinde júrgizilgen tintý kezinde onyń jeke tutynýy úshin zańsyz saqtaǵan untaq tárizdi zat tabylǵan.

— Sot M-ny QR QK 297-baby 3-bóligi 1, 3-tarmaqtary jáne 296-baby 2-bóligi boıynsha kináli dep tanydy. Al D-ny QR QK 28-baby 5-bóligi men 297-baby 3-bóligi 1, 3-tarmaqtary boıynsha aıypty dep tapty. Olarǵa 7 jyl merzimge bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteý belgilendi. Sot úkimi zańdy kúshine engen joq, - dep habarlady vedomstvodan.

Eske sala keteıik, budan buryn BQO-da kólikti mas kúıinde júrgizgen polıtsııa qyzmetkeriniń júrgizýshilik quqyǵynan aıyrylǵanyn jazǵan bolatynbyz.