Oralda esirtki saýdasymen aınalysqan eki stýdent qyz ustaldy

ORAL. KAZINFORM — Batys Qazaqstan oblysy polıtsııa departamenti ekstremızmge qarsy is-qımyl basqarmasynyń qyzmetkerleri jedel izdestirý is-sharalary barysynda Oral qalasyndaǵy kolledjderdiń birinde oqıtyn eki stýdent qyzdy quryqtady.

BQO polıtsııa departamentiniń baspasóz qyzmetinen málim etkenindeı, jeke tekserý kezinde qyzdardyń biriniń syrt kıiminiń qaltasynan polıetılen paketke oralǵan aq untaq zat salynǵan 25 túıinshek tabylyp, tárkilendi. 

- Aldyn ala málimet boıynsha kúdiktiler bul qylmysty birlesip jasaǵan jáne osylaısha jeńil tabys tabýdy kózdegen. Atalǵan derek boıynsha qylmystyq is qozǵaldy. Saraptamalar taǵaıyndalyp, tergep-tekserý amaldary júrgizilýde. Polıtsııa esirtkige qatysty quqyqbuzýshylyqtar úshin jazanyń bultartpas ekenin eskertedi. Mundaı áreketter jasóspirimderdiń ómirin qurtyp qana qoımaı, búkil qoǵamǵa qaýip tóndiredi, - dep habarlady vedomstvodan. 

Departament málimetine sáıkes budan buryn Oral qalasynda esirtki taratty degen kúdikpen 18 jastaǵy jigit ustalǵan bolatyn. Oral qalasy polıtsııa basqarmasy patrýldik polıtsııa batalonynyń qyzmetkerleri kóshede kúdik týdyrǵan jigitpen sóıleskende, ol qashyp ketýge tyrysqan. Alaıda polıtseıler jedel qolǵa túsirgen odan tekserý kezinde aq tústi untaq tárizdi zat salynǵan 10 zip-paket tabyldy. Sonymen qatar oqıǵa ornynan taǵy 3 zip-paket tárkilendi.

Mundaı derekter óńirde jastardyń esirtki qylmysyna barýy azaımaı otyrǵanyn kórsetedi. 
Eske sala keteıik, budan buryn Batys Qazaqstanda 200-den astam jastyń esirtki qylmysyna barǵanyn jazǵan edik.