Oralda esirtki ósiretin jasyryn fıtozerthana joıyldy

ORAL. KAZINFORM — Oralda «Quqyqtyq tártip» jedel aldyn alý is-sharasy barysynda garajynyń jertólesinde zańsyz fıtozerthana jabdyqtaǵan qala turǵyny ustaldy. 

BQO polıtsııa departamentiniń baspasóz qyzmetinen málim etkenindeı, garaj kooperatıvteriniń birinde esirtki zatyna jatatyn ósimdikterdi zańsyz ósirý faktisi belgili boldy.

1984 jylǵy turǵynǵa tıesili garajdan shamdarmen jabdyqtalǵan jáne jylýdy saqtaý úshin arnaıy qaptalǵan fıtozerthana tabyldy. 

— Polıtseıler jedel is-shara barysynda atalǵan jertólede 5 túp qarasora ósimdigi zańsyz ósirilgenin anyqtady. Kúdiktiniń aıtýynsha, ol esirtkiniń tuqymdaryn ınternet-dúken arqyly satyp alǵan. Oqıǵa ornynan 5 túp qarasora ósimdigi, erekshe ıisi bar, sur-jasyl tústi ósimdik tektes zat salynǵan túıinshek, 2 dana jaryq sham, 5 ydys tyńaıtqysh tárkilendi. Atalǵan derek boıynsha qylmystyq is qozǵalyp, tergeý amaldary júrgizilip jatyr, - dep habarlady vedomstvodan. 

Eske sala keteıik, budan buryn Oralda jol erejesin 25 ret buzǵan 21 jastaǵy júrgizýshiniń jalǵan nómirmen júrgenin jazǵan edik.